၅
ၽိုၼ်လိၵ်ႈတင်းသူဝ်းဢွၼ်ႇ
၁ မိူဝ်ႈၼၼ်ႉၵဝ်ႁၼ်ၽိုၼ်လိၵ်ႈဢၼ်ဢဝ်တင်းတူဝ်လိၵ်ႈဢႅၵ်ႉၶရႃႇတၢင်ႇသႂ်ႇၵႃႈတီႈၽၢႆႇၼႂ်းၽၢႆႇၼွၵ်ႈလႄႈတွၵ်ႇတၼ်းသိၵ်ႈၸဵတ်းၵမ်းဝႆႉၼၼ်ႉၵႃႈၼႂ်းမိုဝ်းၶွၼ်ၶႂႃၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၼၼ်ႉဢေႃႈ။
၂ ၵဝ်ႁၼ်တမၢၼ်ႇၵၢင်ႁၢဝ်ဢၼ်ႁႅင်းယႂ်ႇၼႃႇပႃးၼိုင်ႈႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊-ၽူႈလႂ်ၵိုင်ႇထိူၵ်ႈႁႂ်ႈလႆႈၽုၺ်ႇၽိုၼ်လိၵ်ႈၼၼ်ႉလႄႈၵွၵ်းပႅတ်ႈတၼ်းသိၵ်ႈမၼ်းၸိူဝ်းၼၼ်ႉဝႃႈၼင်ႇၼႆယူႇဢေႃႈ။
၃ ၵႃႈၼိူဝ်ၵၢင်ႁၢဝ်ၵႃႈၼိူဝ်လိၼ်မိူင်းၵႃႈတႂ်ႈလိၼ်မိူင်းၽူႈလႂ်ၵေႃႈဢမ်ႇတတ်ႈၼိုင်ႇလႆႈႁႂ်ႈလႆႈၽုၺ်ႇၽိုၼ်လိၵ်ႈၼၼ်ႉလႄႈလူႈတူၺ်း။
၄ မိူဝ်ႈဢၼ်ၵဝ်ႁူႉလွင်ႈဢၼ်ဢမ်ႇထူပ်းဢမ်ႇႁၼ်ၵေႃႉဢၼ်ၵိုင်ႇထိူၵ်ႈၽုၺ်ႇတူၺ်းၽိုၼ်လိၵ်ႈၼၼ်ႉသေၵေႃႉသေၵူၼ်းလႄႈၵဝ်ႁႆႈႁွင်ႉယႂ်ႇၼႃႇလူင်လၢင်ဢေႃႈ။
၅ မိူဝ်ႈၼၼ်ႉၵေႃႉဢၼ်ဢသၢၵ်ႈယႂ်ႇၼၼ်ႉပႃးၼိုင်ႈလၢတ်ႈတီႈၵဝ်လႄႈဝႃႈ၊-ယႃႇပေႁႆႈႁွင်ႉ။သၢင်ႇသီႈၸိူဝ်ႉၶိူဝ်းယုတဢၼ်ပဵၼ်ငဝ်ႈႁၢၵ်ႈတႃႇဝဵတ်ႉၼၼ်ႉပႄႉၼႅင်ႇႁႂ်ႈလႆႈၽုၺ်ႇၽိုၼ်လိၵ်ႈၼၼ်ႉဢိၵ်ႇတင်းတၼ်းသိၵ်ႈမၼ်းၸဵတ်းၸုမ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၆ မိူဝ်ႈၼၼ်ႉၵဝ်ႁၼ်သူဝ်းဢွၼ်ႇဢၼ်ပဵၼ်မိူၼ်ၸိူဝ်ႉၼင်ႇဢၼ်ၶၢမ်ႇတၢင်းဢၼ်ဢဝ်တၢႆယဝ်ႉၼၼ်ႉၸုၵ်းယူႇၵႃႈၼႂ်းၶိုင်ႈၵၢင်ၸႃႉၸဵမ်ပလၢင်ႇၸဝ်ႈလႄႈသတ်ႉတဝႃႇသီႇတူဝ်တင်းၵေႃႉဢၼ်ဢသၢၵ်ႈယႂ်ႇၸိူဝ်းၼၼ်ႉဢေႃႈ။သူဝ်းဢွၼ်ႇၼၼ်ႉမီးၶဝ်ၸဵတ်းလႅမ်ႈတင်းမၢၵ်ႇတႃၸဵတ်းႁူၺ်ႇဢၼ်ဝႃႈဝိၺိၺ်ႇၽြႃးပဵၼ်ၸဝ်ႈၸဵတ်းပႃးဢၼ်ၶၢမ်ႇတၢင်းဢၼ်ပွႆႇၸႂ်ႉၵႂႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်ၼၼ်ႉဢေႃႈ။
၇ မၼ်းၼၼ်ႉမႃးလႄႈၶၢမ်ႇဢဝ်ၽိုၼ်လိၵ်ႈၼၼ်ႉၵႃႈၼႂ်းမိုဝ်းၶွၼ်ၶႂႃၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၼၼ်ႉဢေႃႈ။
၈ မိူဝ်ႈဢၼ်မၼ်းၶၢမ်ႇဢဝ်ၽိုၼ်လိၵ်ႈၼၼ်ႉၸိုင်သတ်ႉတဝႃႇသီႇတူဝ်ဢိၵ်ႇတင်းၵေႃႉဢၼ်ဢသၢၵ်ႈယႂ်ႇသၢဝ်းသီႇၵေႃႉၸိူဝ်းၼၼ်ႉယိပ်းၵမ်တိင်ႇဢိၵ်ႇတင်းၵွၵ်းၶမ်းဢၼ်တဵမ်ဝႆႉတင်းၼၢမ်ႇသႃႇပုၼ်ႈဢၼ်တၵ်းတုတ်ႇၽႆးဢၼ်ဝႃႈပထၼႃႇၵူၼ်းမူတ်းၸၢင်ႇတင်းလၢႆၼၼ်ႉႁင်းၽႂ်ႁင်းမၼ်းလႄႈၶုပ်ႉမူပ်ႇၵႃႈတီႈၽၢႆႇၼႃႈသူဝ်းဢွၼ်ႇယူႇသေလႄႈဢွၼ်ၵၼ်ႁဵတ်းၵႂၢမ်းဢၼ်မႂ်ႇလႄႈလဝ်ႈဝႃႈ၊-
၉ ၸဝ်ႈႁဝ်းထိူၵ်ႈၶၢမ်ႇဢဝ်ၽိုၼ်လိၵ်ႈၼၼ်ႉလႄႈၽုၺ်ႇတၼ်းသိၵ်ႈမၼ်းၸိူဝ်းၼၼ်ႉတီႈၶႃႈဢေႃႈ။လွင်ႈမၼ်းၸမ်းၸဝ်ႈႁဝ်းၶၢမ်ႇတၢင်းဢၼ်ဢဝ်တၢႆလႄႈဢဝ်တင်းလိူတ်ႈၸဝ်ႈႁဝ်းထူတ်ႇဢဝ်ၵူၼ်းတင်းလၢႆၵႃႈၼႂ်းၵူၼ်းၵူႈၸိူဝ်ႉၵူႈၶိူဝ်း
၁၀ ဢၼ်လၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ပုၼ်ႈၽြႃးပဵၼ်ၸဝ်ႈလႄႈၶၢၼ်းၶဝ်ဝႆႉၼႂ်းဢရႃႇၶုၼ်ႁေႃၶမ်းဢိၵ်ႇတင်းၵႃႈၼႂ်းဢရႃႇယိတ်ႉပရေႃးႁိၵ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈႁဝ်းၶႃႈလႄႈပၼ်ဢၶႂၢင်ႉဢၼ်လႆႈဢုပ်ႉပိူင်ႇၵႃႈၼိူဝ်လိၼ်မိူင်းတီႈၶႃႈဢေႃႈ၊ဝႃႈၼင်ႇၼႆဢေႃႈ။
၁၁ မိူဝ်ႈၼၼ်ႉၵဝ်တူၺ်းလႄႈငိၼ်းသဵင်တမၢၼ်ႇၵၢင်ႁၢဝ်ဢၼ်ၼပ်ႉဢၢၼ်ႇၵုၵ်ႉတေႇသင်ႇၶျေႇဢမ်ႇၵႃးၼမ်ၼႃႇထၼ်ႈပေႃးဢမ်ႇႁူႉလႆႈၼၼ်ႉၵႃႈတီႈႁိမ်းၸႃႉၸဵမ်ပလၢင်ႇၸဝ်ႈသတ်ႉတဝႃႇတင်းလၢႆႇဢိၵ်ႇတင်းၵေႃႉဢၼ်ဢသၢၵ်ႈယႂ်ႇၸိူဝ်းၼၼ်ႉဢေႃႈ။
၁၂ ၶဝ်ၸိူဝ်းၼၼ်ႉႁဵတ်းတင်းသဵင်ဢၼ်ယႂ်ႇၼႃႇလႄႈႁွင်ႉဝႃႈ၊-သူဝ်းဢွၼ်ႇဢၼ်ၶၢမ်ႇတၢင်းဢၼ်ဢဝ်တၢႆမႃးယဝ်ႉၼႆႉထိူၵ်ႈၶၢမ်ႇတၼ်းၶူဝ်းၸေးၸိမ်ႇ၊ပိင်ႇၺႃႇဢၸုၼ်း၊ၵုင်ႇသရေႇ၊မုၼ်ဢႃႇၼူႉၽေႃႇ၊တၢင်းလီမင်ႇၵလႃႇတီႈၶႃႈဢေႃႈဝႃႈၼင်ႇၼႆဢေႃႈ။
၁၃ ၵဝ်ငိၼ်းဝူၺ်ႇၼေႇယႃႉသတ်ႉတဝႃႇၵႃႈမီးၵႃႈၼိူဝ်ၵၢင်ႁၢဝ်၊ၵႃႈၼိူဝ်လိၼ်မိူင်း၊ၵႃႈတႂ်ႈလိၼ်မိူင်း၊ၵႃႈၼိူဝ်ၼမ်ႉသမ်ႇမုၵ်ႉတြႃႇ၊ၵူႈတီႈၵူႈလႅၼ်တင်းသဵင်ႈတင်းလူင်ႁွင်ႉလႄႈဝႃႈ၊-ႁႂ်ႈၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇဢိၵ်ႇတင်းသူဝ်းဢွၼ်ႇၼၼ်ႉမီးတၢင်းလီမင်ႇၵလႃႇ၊ၵုင်ႇသရေႇ၊မုၼ်ဢႃႇၼူႉၽေႃႇ၊ဢႃႇၼႃႇၸၢၵ်ႈ၊ၵူႈၵမ်ႇၽႃႇသိုပ်ႇသိုပ်ႇတၢမ်ႈတၢမ်ႈသေၵမ်းလူၺ်ႈတီႈၶႃႈဝႃႈၼင်ႇၼႆယူႇၼၼ်ႉဢေႃႈ။
၁၄ သတ်ႉတဝႃႇသီႇတူဝ်ၸိူဝ်းၼၼ်ႉၵေႃႈႁွင်ႉလႄႈဝႃႈ၊ဢႃႈမိၼ်ႈဝႃႈၼင်ႇၼႆဢေႃႈ။ၵေႃႉဢၼ်ဢသၢၵ်ႈယႂ်ႇၸိူဝ်းၼၼ်ႉၵေႃႈဢွၼ်ၵၼ်ၶုပ်ႉမူပ်ႇလႄႈၵူဝ်းၵႂၢႆႇယူႇဢေႃႈ။