၃
၁ တူၺ်းလႄႈႁႂ်ႈလႆႈႁူႉတၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈဢၼ်ပၼ်ၵႃႈတီႈႁဝ်းတေႃႇထိုင်ႁွတ်ႈထၼ်ႈပေႃးႁႂ်ႈႁဝ်းလႆႈဢၶႂၢင်ႉႁွင်ႉဝႃႈပဵၼ်လုၵ်ႈၽြႃးပဵၼ်ၸဝ်ႈၼၼ်ႉတႃႉ။ၵွပ်ႈႁွႆးၼႆႉၵူၼ်းလေႃးၵီႇတင်းလၢႆဢမ်ႇႁူႉၸၵ်းႁဝ်းၵွပ်ႈပိူဝ်ႈဢၼ်ၶဝ်ဢမ်ႇႁူႉၸၵ်းၽြႃးပဵၼ်ၸဝ်ႈၼၼ်ႉဢေႃႈ။
၂ ၵေႃႉဢၼ်ႁဝ်းႁၵ်ႉၶဝ်ဢိူၺ်း၊တေႃႈလဵဝ်ၼႆႉႁဝ်းပဵၼ်လုၵ်ႈၽြႃးပဵၼ်ၸဝ်ႈဢေႃႈ။လွင်ႈဢၼ်ၵမ်းလိုၼ်းႁဝ်းတၵ်းပဵၼ်ၸိူဝ်ႉၼင်ႇႁိုဝ်ၼၼ်ႉဢမ်ႇပႆႇလႆႈထၢင်ႇသႃး။ၵူၺ်းၵႃႈႁဝ်းႁူႉလွင်ႈဢၼ်ႁဝ်းတၵ်းမိူၼ်ၸိူဝ်ႉၼင်ႇမၼ်းၸဝ်ႈၼႂ်းမိူဝ်ႈဢၼ်မၼ်းၸဝ်ႈထၢင်ႇသႃးပေႃႇမႃးၼၼ်ႉဢေႃႈ။
၃ လွင်ႈမၼ်းၸမ်းႁဝ်းတၵ်းလႆႈႁၼ်မၼ်းၸဝ်ႈၵႃႈၼင်ႇဢၼ်မၼ်းၸဝ်ႈပဵၼ်ယူႇၼၼ်ႉဢေႃႈ။ၵေႃႉဢၼ်မုင်ႈထႃႈမွင်းထႃႈၸိူဝ်ႉၼင်ႇၼၼ်ၼၼ်ႉၸၢင်ႊႁႂ်ႈတူဝ်ၸဝ်ႈၵဝ်ႇမူတ်းၸၢင်ႇမိူၼ်ၸိူဝ်ႉၼင်ႇမၼ်းၸဝ်ႈပဵၼ်ၸဝ်ႈဢၼ်မူတ်းၸၢင်ႇၼၼ်ႉဢေႃႈ။
၄ ၵေႃႉဢၼ်ႁဵတ်းတူႉၸရိူၵ်ႈဢပျႅတ်ႈၸမ်းပူၼ်ႉလိူဝ်ပိင်းၺၢပ်ႈၸဝ်ႈဢေႃႈ။တူႉၸရိူၵ်ႈဢပျႅတ်ႈၸမ်းပဵၼ်တၢင်းဢၼ်ပူၼ်ႉလိူဝ်ပိင်းၺၢပ်ႈၸဝ်ႈဢေႃႈ။
၅ သူႁူႉလွင်ႈဢၼ်မၼ်းၸဝ်ႈထၢင်ႇသႃးပေႃႇမႃးႁႂ်ႈလႆႈဢဝ်ဢပျႅတ်ႈႁဝ်းၵႂႃႇၼၼ်ႉဢေႃႈ။ၵႃႈၼႂ်းမၼ်းၸဝ်ႈၼၼ်ႉဢမ်ႇမီးဢပျႅတ်ႈ။
၆ ၵေႃႉဢၼ်တႄႇယူႇၵႃႈၼႂ်းမၼ်းၸဝ်ႈၼၼ်ႉဢမ်ႇႁဵတ်းတူႉၸရိူၵ်ႈဢပျႅတ်ႈထႅင်ႈ။ၵေႃႉဢၼ်ႁဵတ်းတူႉၸရိူၵ်ႈဢပျႅတ်ႈထႅင်ႈယူႇၶိူဝ်းၶိူဝ်းယႂ်းယႂ်းၼၼ်ႉပဵၼ်ၵေႃႉဢၼ်လႆႈႁူႉလႆႈႁၼ်မၼ်းၸဝ်ႈယဝ်ႉဢမ်ႇၸႂ်ႈ။
၇ လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ယႃႇႁႂ်ႈၽူႈလႂ်လႆႈပႅတ်ႉလႆႈလႅၼ်သူ။ၵေႃႉဢၼ်ၵမ်ၵျၢင်ႉတြႃးတၢင်းဢၼ်သိုဝ်ႈတေႃႇၼၼ်ႉမီးတၢင်းဢၼ်သိုဝ်ႈတေႃႇမိူၼ်ၸိူဝ်ႉၼင်ႇဢၼ်မၼ်းၸဝ်ႈပဵၼ်ဢၼ်သိုဝ်ႈတေႃႇၼၼ်ႉဢေႃႈ။
၈ ပိူဝ်ႈဢၼ်ၸႃႇတၢၼ်ႇမႃႇၼၢတ်ႈပဵၼ်ၵေႃႉဢၼ်ႁဵတ်းတူႉၸရိူၵ်ႈဢပျႅတ်ႈၸႃႉၸဵမ်မိူဝ်ႈၵေႃႇၸႃႉဢွၼ်ႈၼၼ်ႉလႄႈၵေႃႉဢၼ်ႁဵတ်းတူႉၸရိူၵ်ႈဢပျႅတ်ႈၼၼ်ႉၸၢပ်ႈသႅင်ႇၵၼ်တင်းၸႃႇတၢၼ်ႇမႃႇၼၢတ်ႈဢေႃႈ။ၵႂပ်ႈၼႆလႄႈလုၵ်ႈၽြႃးပဵၼ်ၸဝ်ႈထၢင်ႇသႃးပေႃႇမႃးႁႂ်ႈလႆႈယႃႉဢမူႉၸႃႇတၢၼ်ႇမႃႇၼၢတ်ႈၼၼ်ႉပႅတ်ႈဢေႃႈ။
၉ ၵေႃႉဢၼ်ၽြႃးပဵၼ်ၸဝ်ႈႁႂ်ႈၵိူတ်ႇပဵၼ်မႃးၼၼ်ႉဢမ်ႇသိုပ်ႇလႄႈႁဵတ်းတူႉၸရိူၵ်ႈဢပျႅတ်ႈ။လွင်ႈမၼ်းၸမ်းၸိူဝ်ႉၽၼ်းၸဝ်ႈတႄႇယူႇၼႂ်းၵေႃႉၼၼ်ႉဢေႃႈ။ၵေႃႉၼၼ်ႉပိူဝ်ႈဢၼ်ပဵၼ်ၵေႃႉဢၼ်ၵိူတ်ႇပဵၼ်မႃးၼႂ်းၽြႃးပဵၼ်ၸဝ်ႈလႄႈမၼ်းဢမ်ႇသိုပ်ႇလႄႈႁဵတ်းတူႉၸရိူၵ်ႈဢပျႅတ်ႈ။
၁၀ ၵွပ်ႈပိူဝ်ႈလၢၵ်ႈၶၼႃႇၸိူဝ်ႉၼင်ႇၼၼ်ၼၼ်ႉလႄႈလုၵ်ႈၽြႃးပဵၼ်ၸဝ်ႈတင်းလၢႆဢိၵ်ႇတင်းလုၵ်ႈၸႃႇတၢၼ်ႇမႃႇၼၢတ်ႈတင်းလၢႆပႅၵ်ႇပိူင်ႈၵၼ်ယူႇဢေႃႈ။ၵေႃႉဢၼ်ဢမ်ႇၵမ်ဢမ်ႇၵျၢင်ႉတြႃးတၢင်းဢၼ်သိုဝ်ႈတေႃႇ၊ၵေႃႉဢၼ်ဢမ်ႇႁၵ်ႉပီႈၼွင်ႉတူဝ်ၸဝ်ႈၵဝ်ႇၼၼ်ႉဢမ်ႇၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈ။
ၵေႃႉၼိုင်ႈလႄႈၵေႃႉၼိုင်ႈတၵ်းလႆႈႁၵ်ႉၵၼ်
၁၁ ၵႂၢမ်းၽြႃးဢၼ်သူလႆႈငိၼ်းၸႃႉၸဵမ်မိူဝ်ႈၵေႃႇၸႃႉဢွၼ်ၼၼ်ႉၸမ်းယင်းဢမ်ႇမိူၼ်ၸိူဝ်ႉၼင်ႇၵႃႇဢိၼဢၼ်ၸၢပ်ႈသႅင်ႇၵၼ်တင်းၸႃႇတၢၼ်ႇမႃႇၼၢတ်ႈလႄႈဢဝ်ၼွင်ႉၸၢႆးမၼ်းတၢႆၼၼ်ႉ။ႁဝ်းၵေႃႉၼိုင်ႈလႄႈၵေႃႉၼိုင်ႈတၵ်းလႆႈႁၵ်ႉၵၼ်ပႅင်းၵၼ်ဢေႃႈ၊ဝႃႈၼႆ၊မီးမႃးၼင်ႇၼႆဢေႃႈ။
၁၂ ၵႃႇဢိၼၼၼ်ႉဢဝ်ၼွင်ႉၸၢႆးမၼ်းတၢႆၵွပ်ႈပိူဝ်ႈၸိူဝ်ႉၼင်ႇႁိုဝ်၊ဝႃႈၼႆၸမ်း၊တၢင်းႁဵတ်းတၢင်းသၢင်ႈမၼ်းပဵၼ်ဢၼ်ႁၢႆႉမိူၵ်ႈလႄႈတၢင်းႁဵတ်းတၢင်းသၢင်ႈၼွင်ႉၸၢႆးမၼ်းပဵၼ်ဢၼ်သိုဝ်ႈတေႃႇဢေႃႈ။
၁၃ ပီႈၼွင်ႉၶဝ်ဢိူၺ်း၊ပေႃးလေႃးၵႃႉၸင်းသူၸိုင်ယႃႇပေဢၢမ်း။
၁၄ ႁဝ်းႁူႉလွင်ႈဢၼ်ႁဝ်းလုၵ်ႉသေၵႃႈတီႈတၢင်းတၢႆလႄႈၶၢမ်ႈၵႂႃႇၸူးၵႃႈတီႈတၢင်းဢၼ်ဢသၢၵ်ႈလိပ်းၵွပ်ႈပိူဝ်ႈႁဝ်းႁၵ်ႉပီႈႁၵ်ႉၼွင်ႉႁဝ်းၼၼ်ႉဢေႃႈ။ၵေႃႉဢၼ်ဢမ်ႇႁၵ်ႉပီႈႁၵ်ႉၼွင်ႉတူဝ်ၸဝ်ႈၵဝ်ႇၼၼ်ႉတႄႇယူႇၼႂ်းတၢင်းတၢႆဢေႃႈ။
၁၅ ၵေႃႉဢၼ်ၸင်းပီႈၼွင်ႉတူဝ်ၸဝ်ႈၵဝ်ႇၼၼ်ႉပဵၼ်ၵေႃႉဢၼ်ဢဝ်ဢသၢၵ်ႈၵူၼ်းတၢႆဢေႃႈ။သူႁူႉလွင်ႈဢၼ်ဝႃႈဢသၢၵ်ႈထႃႇဝရႃႉဢမ်ႇတႄႇဢမ်ႇမီးၼႂ်းၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉ။
၁၆ ႁဝ်းထွၵ်ႈလူၺ်ႈလွင်ႈဢၼ်ၸဝ်ႈၶရိၸ်ႉၸုၼ်ႉဢသၢၵ်ႈမၼ်းၸဝ်ႈပုၼ်ႈႁဝ်းၼၼ်ႉလႄႈႁဝ်းလႆႈႁူႉလွင်ႈတၢင်းႁၵ်ႉမႅတ်ႈတႃႇဢေႃႈ။
၁၇ ႁဝ်းၵေႃႈထုၵ်ႇလီၸုၼ်ႉဢသၢၵ်ႈပုၼ်ႈပီႈပုၼ်ႈၼွင်ႉဢေႃႈ။ၽူႈလႂ်သေဢမ်ႇဝႃႈၵေႃႉဢၼ်မီးဢုၵ်ႉၸႃႇၶူဝ်းလဵင်းၼမ်လႄႈႁၼ်ပီႈၼွင်ႉတူဝ်ၸဝ်ႈၵဝ်ႇယၢၵ်ႈၽၢၼ်သေၵေႃႈယႃႇဢမ်ႇမီးၸႂ်ၵရူႉၼႃႇတၢင်းဢၼ်ဢိတ်းလူၸိုင်မႅတ်ႈတႃႇၽြႃးပဵၼ်ၸဝ်ႈတၵ်းမီးၵႃႈၼႂ်းၵေႃႉၼၼ်ႉလႆႈၸိူဝ်ႉၼင်ႇႁိုဝ်။
၁၈ လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ႁဝ်းယင်းဢမ်ႇဢဝ်တင်းသူပ်းတင်းၵႂၢမ်းႁၵ်ႉၵၼ်လၢႆလၢႆၵူၺ်းလႄႈဢွၼ်ၵၼ်ပႃးတင်းတူဝ်တင်းၸႂ်သေလႄႈႁၵ်ႉၵၼ်ဢမၢၼ်ႇၶၼ်ပဵၼ်တႃႉႁဝ်း။
၁၉ ပေႃးႁၵ်ႉၵၼ်ၸိူဝ်ႉၼင်ႇၼၼ်ၸိုင်ႁဝ်းတၵ်းလႆႈႁူႉလွင်ႈဢၼ်ဝႃႈတူဝ်ၸဝ်ႈၵဝ်ႇၸၢပ်ႈသႅင်ႇၵၼ်တင်းသမ်ႇမႃႇတြႃးလႄႈတၵ်းႁႂ်ႈႁူဝ်ၸႂ်တူဝ်ၸဝ်ႈၵဝ်ႇသၢၵ်ႈသႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
၂၀ လွင်ႈမၼ်းၸမ်းပေႃးႁူဝ်ၸႂ်တူဝ်ၸဝ်ႈၵဝ်ႇတၢင်ႇဢပျႅတ်ႈၵႃႈၼိူဝ်တူဝ်ၸဝ်ႈၵဝ်ႇၸိုင်ႁဝ်းႁူႉလွင်ႈဢၼ်ႁဝ်းမီးယူႇၼႂ်းသႅတ်ႈၸႃႇတြႃးလႄႈႁူဝ်ၸႂ်ႁဝ်းၵတ်းယဵၼ်ၽၢႆႇၼႃႈၽြႃးပဵၼ်ၸဝ်ႈဢေႃႈ။ၽြႃးပဵၼ်ၸဝ်ႈယႂ်ႇမျၢတ်ႈၼႃႇသေႁူဝ်ၸႂ်ႁဝ်းလႄႈမၼ်းၸဝ်ႈႁူႉၵႃႈမီးတင်းသိင်တင်းမူတ်းဢေႃႈ။
၂၁ ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ပေႃးႁူဝ်ၸႂ်ႁဝ်းဢမ်ႇမီးတၢင်းဢၼ်တၢင်ႇဢပျႅတ်ႈၼိူဝ်တူဝ်ၸဝ်ႈၵဝ်ႇၸိုင်ႁဝ်းလႆႈတမ်းၸႂ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။
၂၂ ၵႃႈဢၼ်ႁဝ်းသူးတွင်းၼၼ်ႉႁဝ်းလႆႈၵႃႈတီႈၽြႃးပဵၼ်ၸဝ်ႈၵွပ်ႈပိူဝ်ႈဢၼ်ႁဝ်းပႂ်ႉၵမ်ပိင်းၺၢပ်ႈမၼ်းၸဝ်ႈတင်းလၢႆသေလႄႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်ထုၵ်ႇၸႂ်မၼ်းၸဝ်ႈၼၼ်ႉဢေႃႈ။
၂၃ ပိင်းၺၢပ်ႈၽြႃးပဵၼ်ၸဝ်ႈၸမ်းပဵၼ်ပိင်းၺၢပ်ႈဢၼ်ဝႃႈတၵ်းလႆႈယုမ်ႇမၢတ်ႈၼႃႇမႃႉၸိုဝ်သဵင်လုၵ်ႈၸဝ်ႈၸဝ်ႈယေႇသုၶရိၸ်ႉၼၼ်ႉဢေႃႈ။ၼင်ႇၵၼ်ၵၼ်တၵ်းလႆႈႁၵ်ႉၵၼ်မႅၼ်ႈၸွမ်းၵႃႈၼင်ႇဢၼ်လုၵ်ႈၸဝ်ႈပိင်းၺၢပ်ႈဝႆႉၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၄ ၵေႃႉဢၼ်ပႂ်ႉၵမ်ပႂ်ႉၸွမ်းပိင်းၺၢပ်ႈမၼ်းၸဝ်ႈတင်းလၢႆၼၼ်ႉတႄႇယူႇၼႂ်းၽြႃးပဵၼ်ၸဝ်ႈဢေႃႈ။ၼႂ်းၵေႃႉၼၼ်ႉၵေႃႈၽြႃးပဵၼ်ၸဝ်ႈတႄႇယူႇဢေႃႈ။ႁဝ်းဢိင်ပိုင်ႈဝိၺိၺ်ႇမူတ်းၸၢင်ႇၸဝ်ႈဢၼ်မၼ်းၸဝ်ႈပၼ်တီႈႁဝ်းၼၼ်ႉလႄႈလႆႈႁူႉလွင်ႈဢၼ်ၽြႃးပဵၼ်ၸဝ်ႈတႄႇယူႇၼႂ်းႁဝ်းၼၼ်ႉဢေႃႈ။