၁
၁ ၵဝ်၊ယႃႇၵုပ်ႉ၊ဢၼ်ပဵၼ်ၵူၼ်းၸႂ်ႉၽြႃးပဵၼ်ၸဝ်ႈတင်းၸဝ်ႈယေႇသုၶရိၸ်ႉၼႆႉပၼ်မႅတ်ႈတႃႇၵႂႃႇၵႃႈတီႈမဵဝ်းၸိူဝ်ႉၶိူဝ်းသိပ်းသွင်ပႃး၊ဢၼ်ၽၢတ်ႇၽႄၵၼ်မီးယူႇၵူႈတီႈၵူႈလႅၼ်ၼၼ်ႉဢေႃႈ။
ယိူၼ်ႉၶၢမ်ႇတၢင်းဢၼ်ၸုင်ႇၸၢမ်း
၂ ပီႈၼွင်ႉၵဝ်တင်းလၢႆဢိူၺ်း၊သူႁူႉလွင်ႈဢၼ်တၢင်းဢၼ်ၸႅတ်ႈထၢမ်ၸၢမ်းတူၺ်းတၢင်းယုမ်ႇမၢတ်ႈသူၼၼ်ႉတၵ်းႁႂ်ႈတၢင်းဢၼ်ယိူၼ်ႉၶၢမ်ႇယႂ်ႇၵႂၢင်ႈမႃးလႄႈ
၃ မိူဝ်ႈဢၼ်သူႁူပ်ႉထူပ်းတၢင်းဢၼ်ၸႅတ်ႈထၢမ်ၸၢမ်းတူၺ်းၵူႈၸိူဝ်ႉၵူႈပိူင်ၼၼ်ႉၸိုင်မၢတ်ႈပဵၼ်လွင်ႈတၢင်းဢၼ်လီသိူဝ်းပျေႃႇတႃႉ။
၄ လွင်ႈၼင်ႇႁိုဝ်သူတၵ်းဢမ်ႇလူဝ်ႇထႅင်ႈသေဢိတ်းလႄႈၸေးၸုမ်ႇတဵမ်ဝႆႉၼၼ်ႉၸိုင်ႁႂ်ႈတၢင်းဢၼ်ယိူၼ်ႉၶၢမ်ႇသူၼၼ်ႉႁဵတ်းပဵၼ်တင်းသဵင်ႈတင်းလူင်သေၵမ်း။
၅ ၼႂ်းသူၼၼ်ႉပေႃးသေၵေႃႉသေၵူၼ်းဢမ်ႇမီးၺၢၼ်ႇၸိုင်ႁႂ်ႈမၼ်းယွၼ်းဢဝ်ၵႃႈတီႈၽြႃးပဵၼ်ၸဝ်ႈဢၼ်ဢမ်ႇသေႉသွမ်းတၢင်ႇဢပျႅတ်ႈဢၼ်မီးၸႂ်ၸေႇတၼႃႇလႄႈပၼ်တီႈၵူၼ်းတင်းသဵင်ႈတင်းလူင်ၼၼ်ႉတႃႉ။မၼ်းၸဝ်ႈတၵ်းပၼ်တီႈၵေႃႉၼၼ်ႉဢေႃႈ။
၆ ၵူၺ်းၵႃႈၵေႃႉဢၼ်ယွၼ်းၼၼ်ႉမၼ်းတၵ်းဢမ်ႇလႆႈမီးၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုၼ်ႈၼိုင်ႈလႄႈတၵ်းလႆႈမီးၸႂ်ယုမ်ႇဝႃႈတေလႆႈတႄႉဢေႃႈ၊ဝႃႈၼႆလႄႈယွၼ်းဢေႃႈ။ၵေႃႉဢၼ်ဢမ်ႇယုမ်ႇတႄႉတႄႉၼၼ်ႉမၼ်းမိူၼ်ၸိူဝ်ႉၼင်ႇလႅင်းၼမ်ႉပိူပ်ႇၼမ်ႉၼမ်ႉပၢင်ႇလၢႆႇဢၼ်လူမ်းထူဝ်းလႄႈတူင်ႉၼိုင်ႁၢႆလၢႆၵႂႃႇၼၼ်ႉဢေႃႈ။
၇ ယႃႇပေႁႂ်ႈမၼ်းထၢင်ႇတၵ်းလႆႈသေၸိူဝ်ႉသေပိူင်ၵႃႈၼႂ်းမိုဝ်းၽြႃးပဵၼ်ၸဝ်ႈ။
၈ ၵူၼ်းၸိူဝ်ႉၼင်ႇၼၼ်ၼၼ်ႉပဵၼ်ၵေႃႉဢၼ်မီးႁူဝ်ၸႂ်သွင်ၽၢႆႇသွင်ပႃႈ၊ၵေႃႉဢၼ်ဢမ်ႇမၼ်ႈဢမ်ႇၶိူင်ႇၵႃႈၼႂ်းၵႃႈဢၼ်မၼ်းႁဵတ်းတင်းသဵင်ႈတင်းလူင်ၼၼ်ႉဢေႃႈ။
၉ ႁႂ်ႈပီႈၼွင်ႉဢၼ်မီးၸႂ်ဢူၼ်ႈဢွၼ်ႇၶျႃးတႅမ်ႇၼၼ်ႉဢုပ်ႇဝၢဝ်းသိူဝ်းပျေႃႇၵႃႈၼႂ်းတၢင်းဢၼ်တူဝ်ၸဝ်ႈၵဝ်ႇၶိုၼ်ႈယႂ်ႇၼၼ်ႉတႃႉ။
၁၀ ႁႂ်ႈၵေႃႉဢၼ်မၢၵ်ႈမီးၼၼ်ႉဢုပ်ႇဝၢဝ်းၼႂ်းတၢင်းဢၼ်တူဝ်ၸဝ်ႈၵဝ်ႇတူၵ်းတႅမ်ႇၼၼ်ႉတႃႉ။လွင်ႈမၼ်းၸမ်းမၼ်းတၵ်းလႆႈႁၢႆလၢႆၵႂႃႇမိူၼ်ၸိူဝ်ႉၼင်ႇယိူဝ်ႈယႃႈၼၼ်ႉဢေႃႈ။
၁၁ မိူဝ်ႈဢၼ်ၵၢင်ဝၼ်းဢွၵ်ႇမႃးဢိၵ်ႇတင်းသၢႆဢရွင်ႇမႆႈၼၼ်ႉၸိုင်ယိူဝ်ႈယႃႈၼၼ်ႉၸၢင်ႊႁွတ်ႈထိုင်တၢင်းဢၼ်ႁဵဝ်ႇႁႅင်ႈၵႂႃႇလႄႈမွၵ်ႇမၼ်းၵေႃႈၸၢင်ႊလူၼ်ႇႁူင်ႈၵႂႃႇဢေႃႈ။ႁၢင်ႊၽၢင်မၼ်းဢၼ်ႁၢင်ႊလီၼၼ်ႉၵေႃႈၸၢင်ႊႁွတ်ႈထိုင်တၢင်းလူႉတၢင်းလႅဝ်ၵႂႃႇဢေႃႈ။မိူၼ်ၸိူဝ်ႉၼင်ႇၼၼ်ၵူၼ်းဢၼ်မၢၵ်ႈမီးၼၼ်ႉတၵ်းလႆႈႁွတ်ႈထိုင်တၢင်းဢၼ်ႁဵဝ်ႇႁႅင်ႈလူႉလႅဝ်ၵႂႃႇၼႂ်းမိူဝ်ႈဢၼ်မၼ်းယင်းႁဵတ်းယူႇၼၼ်ႉဢေႃႈ။
၁၂ ၵေႃႉဢၼ်ယိူၼ်ႉၶၢမ်ႇတၢင်းဢၼ်ၸႅတ်ႈထၢမ်ၸၢမ်းတူၺ်းၼၼ်ႉမီးမင်ႇၵလႃႇဢေႃႈ။လွင်ႈမၼ်းၸမ်းပိူဝ်ႈဢၼ်မၼ်းၸုၵ်းၶၢမ်ႇတၢင်းဢၼ်ၸႅတ်ႈထၢမ်ၸၢမ်းတူၺ်းၼၼ်ႉလႄႈမၼ်းတၵ်းလႆႈသရၽူႇဢသၢၵ်ႈဢၼ်ၸဝ်ႈၽြႃးဝႆႉၵတိတီႈၶဝ်ၸိူဝ်းဢၼ်ႁၵ်ႉမၼ်းၸဝ်ႈၼၼ်ႉဢေႃႈ။
၁၃ ၽူႈလႂ်သေဢမ်ႇဝႃႈမိူဝ်ႈဢၼ်လႆႈၶၢမ်ႇတၢင်းဢၼ်ဢပျႅတ်ႈၸူဝ်းၵႂႃႇၸူဝ်းပႆၼၼ်ႉယႃႇပေဝႃႈ၊-ၵဝ်လႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈၸူဝ်းဢဝ်ၵဝ်၊ဝႃႈၸိူဝ်ႉၼင်ႇၼႆ။လွင်ႈမၼ်းၸမ်းတၢင်းဢၼ်ဢမ်ႇလီဢမ်ႇငၢမ်းဢမ်ႇၸူဝ်းၵႂႃႇၸူဝ်းပႆၽြႃးပဵၼ်ၸဝ်ႈလႆႈ။မၼ်းၸဝ်ႈၵေႃႈဢမ်ႇၸူဝ်းဢဝ်ၽူႈလႂ်သေၵေႃႉသေၵူၼ်းႁႂ်ႈၵႂႃႇၵႃႈၼႂ်းဢပျႅတ်ႈ။
၁၄ ၵွပ်ႈပိူဝ်ႈတၢင်းဢၼ်ၸႂ်တူဝ်ၸဝ်ႈၵဝ်ႇၸပ်းၸွႆးၼၼ်ႉၵူၼ်းၵူႈၵေႃႉလႆႈၶၢမ်ႇတၢင်းဢၼ်တိုတ်ႉၸၼ်ၸူဝ်းဢဝ်ၵႂႃႇလႄႈႁွတ်ႈထိုင်တၢင်းဢၼ်ဢပျႅတ်ႈၸူဝ်းၵႂႃႇၸူဝ်းပႆဢေႃႈ။
၁၅ ၸႂ်ဢၼ်ၸပ်းၸွႆးၼၼ်ႉပႃးပတိၵ်ႉသၼ်ႇထေႇလႄႈၸၢင်ႊၵိူတ်ႇလဵင်ႉဢပျႅတ်ႈတူႉၸရိူၵ်ႈမႃးဢေႃႈ။ဢပျႅတ်ႈတူႉၸရိူၵ်ႈၼၼ်ႉၵေႃႈမိူဝ်ႈဢၼ်ၸေးၸုမ်ႇယဝ်ႉၼၼ်ႉၸၢင်ႊၵိူတ်ႇလဵင်ႉတၢင်းတၢႆမႃးဢေႃႈ။
၁၆ ပီႈၼွင်ႉဢၼ်ၵဝ်ႁၵ်ႉၶဝ်ဢိူၺ်း၊ယႃႇပေၶၢမ်ႇတၢင်းဢၼ်ပႅတ်ႉလႅၼ်။
၁၇ သူႉၵျေးၸူးဢၼ်မျၢတ်ႈလီလႄႈၸေးၸုမ်ႇၵႃႈမီးတင်းသဵင်ႈတင်းလူင်ၼၼ်ႉလုၵ်ႉသေၵႃႈၼိူဝ်ၵႃႈတီႈပေႃႈဢၼ်လႅင်းဢၼ်ဢမ်ႇမီးတၢင်းဢၼ်သုတ်ႈယွမ်းပိူင်ႈၵႂႃႇလႄႈၵၢင်းလွတ်ႈတင်းသၢႆငၢႆတၢင်းဢၼ်ၶၢႆႉပုတ်ႈၼၼ်ႉလူင်းမႃးဢေႃႈ။
၁၈ မၼ်းၸဝ်ႈၼၼ်ႉဢဝ်တင်းၵႂၢမ်းသမ်ႇမႃႇတြႃးလႄႈႁႂ်ႈႁဝ်းၵိူတ်ႇမႃးပဵၼ်ၸိူဝ်ႉၼင်ႇမၢၵ်ႇဢၼ်မၢၵ်ႇဢွၼ်တၢင်းပိူၼ်ႈၼႂ်းၼီႉမိၵ်ႉတႃႉသတ်တဝႃႇတင်းလၢႆဢေႃႈ။
တၢင်းႁဵတ်းတၢင်းသၢင်ႈဢၼ်ၸႅတ်ႈမၢၼ်ႇ
၁၉ ပီႈၼွင်ႉဢၼ်ၵဝ်ႁၵ်ႉၶဝ်ဢိူၺ်း၊သူႁူႉလွင်ႈမၼ်းတၢင်းမၼ်းယူႇဢေႃႈ။ႁႂ်ႈၵူႈၵေႃႉၵူႈၵူၼ်းဢွၼ်ၵၼ်ႁဵတ်းၶၼ်ႁဵတ်းၽႂ်းၼႂ်းတၢင်းဢၼ်ထွမ်ႇငိၼ်းလႄႈႁဵတ်းထိူင်းႁဵတ်းၼၢၼ်းၼႂ်းတၢင်းဢၼ်လၢတ်ႈၵႂၢမ်းဢိၵ်ႇတင်းၼႂ်းတၢင်းဢၼ်ၸႂ်မႆႈၶႂ်ႈၸႃႉဢွၵ်ႇၼၼ်ႉတႃႉ။
၂၀ လွင်ႈမၼ်းၸမ်းတၢင်းၸႂ်မႆႈၶႂ်ႈၸႃႉၵူၼ်းႁဝ်းၼႆႉဢမ်ႇၸၢင်ႊပွင်ႁဵတ်းတြႃးတၢင်းဢၼ်သိုဝ်ႈတေႃႇၽြႃးပဵၼ်ၸဝ်ႈ။
၂၁ ပိူဝ်ႈၼႆလႄႈပေႇပႅတ်ႈတၢင်းဢၼ်ၵူဝ်ႈၵိူၵ်ႇၵူႈၸိူဝ်ႉၵူႈပိူင်ဢိၵ်ႇတင်းတၢင်းဢၼ်ၸႂ်သီႇၵေႉႁေႈတႃပိူၼ်ႈၸိူဝ်းၼၼ်ႉသေလႄႈဢဝ်တင်းၸႂ်ဢၼ်ၼိမ်သိမ်ႇဢူၼ်ႈဢွၼ်ႇၶၢမ်ႇဢဝ်ၼုၵ်ႉၵပၢတ်ႈၽြႃးဢၼ်ၽုၵ်ႇသွမ်ႈၵႃႈတီႈၽၢႆႇတၢင်းၼႂ်းလႄႈၵႄႇၶျွတ်ႈဢဝ်ဝိၺိၺ်ႇသူလႆႈၼၼ်ႉတႃႉ။
၂၂ ယႃႇပပေဵၼ်ၵေႃႉဢၼ်ထွမ်ႇငိၼ်းၼုၵ်ႉၵပၢတ်ႈတြႃးလၢႆလၢႆၵူၺ်းလႄႈတူဝ်ၸဝ်ႈၵဝ်ႇပႅတ်ႉလႅၼ်တူဝ်ၸဝ်ႈၵဝ်ႇၼၼ်ႉ။ပဵၼ်ၵေႃႉဢၼ်ၵမ်ၵျၢင်ႉတြႃးတႃႉ။
၂၃ ၵေႃႉဢၼ်ဢမ်ႇၵမ်ဢမ်ႇၵျၢင်ႉတြႃးလႄႈထွမ်ႇငိၼ်းလၢႆလၢႆၵူၺ်းၼၼ်ႉမိူၼ်ၸိူဝ်ႉၼင်ႇၵေႃႉဢၼ်တူၺ်းၼႃႈပၵတိတူဝ်ၸဝ်ႈၵဝ်ႇၵႃႈၼႂ်းမၢၼ်ႇၸမ်ၼၼ်ႉဢေႃႈ။
၂၄ တူဝ်ၸဝ်ႈၵဝ်ႇယႅၵ်ႉတူၺ်းတူဝ်ၸဝ်ႈၵဝ်ႇသေယဝ်ႉၵႂႃႇတၢင်ႇတီႈတၢင်ႇလႅၼ်လႄႈလိုမ်းပႅတ်ႈႁၢင်ႊၽၢင်တူဝ်ၸဝ်ႈၵဝ်ႇၼၼ်ႉၵမ်းလဵဝ်ဢေႃႈ။
၂၅ ၵေႃႉဢၼ်လူႈတူၺ်းၼႂ်းတြႃးဢၼ်ၸေးၸုမ်ႇဢၼ်ၸၢပ်ႈသႅင်ႇၵၼ်တင်းတၢင်းဢၼ်ၵၢင်းလွတ်ႈၼၼ်ႉၸေးၸေးၸွတ်ႇၸွတ်ႇလႄႈမၼ်ႈၶိူင်ႇယူႇၼၼ်ႉၸမ်းၵွပ်ႈပိူဝ်ႈပဵၼ်ၵေႃႉဢၼ်ထွမ်ႇငိၼ်းတြႃးလႄႈလိုမ်းပႅတ်ႈဢမ်ႇၸႂ်ႈ။ပဵၼ်ၵေႃႉဢၼ်ၵမ်ၵျင်ႉတြႃးၼၼ်ႉလႄႈပဵၼ်ၵေႃႉဢၼ်မီးမင်ႇၵလႃႇၼႂ်းလွင်ႈတၢင်းဢၼ်တူဝ်ၸဝ်ႈၵဝ်ႇၵမ်ၵျၢင်ႉၼၼ်ႉဢေႃႈ။
၂၆ ၼႂ်းသူၼၼ်ႉပေႃးသေၵေႃႉသေၵူၼ်းႁဵတ်းၸိူဝ်ႉၼင်ႇႁၢင်ႊမီးသီႇလႃႉလႄႈဢမ်ႇၶျူၵ်ႈသူပ်းတူဝ်ၸဝ်ႈၵဝ်ႇလႄႈပႅတ်ႉလႅၼ်ႁူဝ်ၸႂ်တူဝ်ၸဝ်ႈၵဝ်ႇယူႇၸိုင်သီႇလႃႉမၼ်းၼၼ်ႉပဵၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။
၂၇ သီႇလႃႉဢၼ်ၶၢဝ်ၸၢင်ႇမူတ်းသႂ်ၵႃႈတီႈၽၢႆႇၼႃႈပေႃႈၽြႃးပဵၼ်ၸဝ်ႈၼၼ်ႉၸမ်းပဵၼ်တၢင်းဢၼ်လူႈတူၺ်းလုၵ်ႈဢွၼ်ႇဢၼ်ဢမ်ႇမီးပေႃႈမီးမေႈဢိၵ်ႇတင်းမေႈမုၵ်ႉမေႈမၢႆႈတင်းလၢႆၵႃႈၼႂ်းၶိင်ႇမိူဝ်ႈဢၼ်ၶဝ်မီးတုၵ်ႉၶႃႉတၢင်းၽၢၼ်ၼၼ်ႉဢိၵ်ႇတင်းတၢင်းဢၼ်ပႂ်ႉတူၺ်းတူဝ်ၸဝ်ႈၵဝ်ႇႁႂ်ႈတူဝ်ၸဝ်ႈၵဝ်ႇလႆႈၵၢင်းလွတ်ႈတင်းတၢင်းဢၼ်ဝူၺ်ႇဢၼ်ႁင်ႈလေႃးၵႃႉၼႆႉၼၼ်ႉဢေႃႈ။