၁၃
၁ ပွၵ်ႈသၢမ်ၼႆႉၵဝ်တၵ်းမႃးၸူးၵႃႈတီႈသူဢေႃႈ။ၵႂၢမ်းၵႃႈမီးတၵ်းလႆႈတႄႇၵွပ်ႈပိူဝ်ႈၶဝ်ၸိူဝ်းဢၼ်ၶၢမ်ႇသၢၵ်ႈသေႇသွင်ၵေႃႉသၢမ်ၵေႃႉၼၼ်ႉဢေႃႈ။
၂ မိူဝ်ႈဢွၼ်ၼႆႉၼၼ်ႉၵဝ်လႆႈလၢတ်ႈတီႈၶဝ်ၸိူဝ်းဢၼ်လႆႈၽိတ်းပိူင်ႈဢိၵ်ႇတင်းၶဝ်ၸိူဝ်းဢၼ်ၵိုတ်းၵျၢၼ်ႇတင်းသဵင်ႈတင်းလူင်ၼၼ်ႉလႄႈဝႃႈ၊-ပေႃးၵဝ်သမ်ႉၶိုၼ်းႁွတ်ႈမႃးၸိုင်ၵဝ်တၵ်းဢမ်ႇလႆႈဢိတ်းလူသူၵူၺ်း၊ဝႃႈၼင်ႇၼႆဝႆႉယဝ်ႉဢမ်ႇၵႃး၊တေႃႈလဵဝ်ၼႆႉပဵၵ်ႉသမ်ႉၵဝ်ဢမ်ႇမီးလူၺ်ႈၵၼ်တင်းသူသေၵေႃႈၵဝ်လၢတ်ႈဝႆႉဢွၼ်တၢင်းမိူၼ်ၸိူဝ်ႉၼင်ႇမိူဝ်ႈဢၼ်ၵဝ်မီးယူႇတီႈသူပွၵ်ႈသွင်ၼၼ်ႉဢေႃႈ။
၃ ပိူဝ်ႈဢၼ်သူႁႃသၢၵ်ႈသေႇလွင်ႈဢၼ်ၸဝ်ႈၶရိၸ်ႉၼႄပျႃးပျႃႇတိၵ်ႈၸဝ်ႈၼႂ်းၵဝ်ၼၼ်ႉၸိုင်ၼႂ်းတၢင်းဢၼ်မၼ်းၸဝ်ႈသိူၵ်ႈသမ်ႇလူၺ်ႈၵၼ်တင်းသူၼၼ်ႉမၼ်းၸဝ်ႈဢမ်ႇႁႅင်းဢူၼ်ႈ။မၼ်းၸဝ်ႈႁႅင်းယႂ်ႇၼႃႇၵႃႈၼႂ်းသူဢေႃႈ။လွင်ႈမၼ်းၸမ်းၸဝ်ႈၶရိၸ်ႉၼၼ်ႉပဵၵ်ႉသမ်ႉၶၢမ်ႇတၢင်းတၢႆၵႃႈၼိူဝ်သဝ်လၵ်းဝႃးမိုဝ်းၼႂ်းတၢင်းဢၼ်ႁႅင်းလဵၵ်ႉသေၵေႃႈ၊ဢသၢၵ်ႈလိပ်းယူႇၵွပ်ႈပိူဝ်ႈတၼ်းၶူဝ်းၽြႃးပဵၼ်ၸဝ်ႈဢေႃႈ။
၄ ပဵၵ်ႉသမ်ႉႁဝ်းႁႅင်းလဵၵ်ႉၸိူဝ်ႉၼင်ႇၸဝ်ႈၶရိၸ်ႉၼၼ်ႉသေၵေႃႈ၊ႁဝ်းတၵ်းမီးတၢင်းဢၼ်ဢသၢၵ်ႈလိပ်းၸိူဝ်ႉၼင်ႇၸဝ်ႈၶရိၸ်ႉၵွပ်ႈပိူဝ်ႈတၼ်းၶူဝ်းၽြႃးပဵၼ်ၸဝ်ႈပုၼ်ႈတၵ်းပွင်ဢမူႉပုၼ်ႈသူဢေႃႈ။
သူတႄႇယူႇၼႂ်းတၢင်းယုမ်ႇမၢတ်ႈႁိုဝ်၊ဢမ်ႇတႄႇယူႇႁိုဝ်ဝႃႈၼႆ၊ၸႅတ်ႈထၢမ်တူဝ်ၸဝ်ႈၵဝ်ႇလူးၵွၼ်ႇတႃႉ။ၸၢမ်းတူၺ်းတူဝ်ၸဝ်ႈၵဝ်ႇလူးၵွၼ်ႇတႃႉ။
၅ ပေႃးဢမ်ႇၶၢမ်ႇတၢင်းဢၼ်ၸႅတ်ႈထၢမ်ၸၢမ်းတူၺ်းတူဝ်ၸဝ်ႈၵဝ်ႇၸိုင်တၵ်းဢမ်ႇႁူႉလွင်ႈဢၼ်ၸဝ်ႈယေႇသုၶရိၸ်ႉတႄႇယူႇၵႃႈၼႂ်းသူၼၼ်ႉ။
၆ ၵဝ်မုင်ႈမွင်းသူတၵ်းႁူႉလွင်ႈဢၼ်ဝႃႈႁဝ်းပဵၼ်ၵေႃႉဢၼ်ၶၢမ်ႇတၢင်းဢၼ်ၸႅတ်ႈထၢမ်လႄႈဢမ်ႇသုမ်းၼၼ်ႉဢေႃႈ။
၇ ႁဝ်းႁဵတ်းသူးတွင်းပထၼႃႇတီႈၽြႃးပဵၼ်ၸဝ်ႈႁႂ်ႈသူဢမ်ႇလႆႈႁဵတ်းတၢင်းဢၼ်ဢမ်ႇလီဢမ်ႇငၢမ်းသေၸိူဝ်ႉသေပိူင်ၼၼ်ႉဢေႃႈ။ၵူၼ်းၵူႈၵေႃႉတေႁူႉလွင်ႈဢၼ်ႁဝ်းၸုၵ်းၶၢမ်ႇတၢင်းဢၼ်ၸႅတ်ႈထၢမ်လႄႈပႄႉယဝ်ႉၼၼ်ႉဢမ်ႇၸႂ်ႈ။
၈ မိူၼ်ၼင်ႇႁဝ်းသုမ်းသေတႃႉၵေႃႈသူဢွၼ်ၵၼ်ႁဵတ်းဢၼ်မၢၼ်ႇမႅၼ်ႈၸိုဝ်ႈၸႂ်ႈၼၼ်ႉသေၵမ်း။
ႁဝ်းဢမ်ႇႁႄႉၶႅၼ်သမ်ႇမႃႇတြႃးၼၼ်ႉလႆႈလႃးလႃးလႄႈလႆႈယူႇၽၢႆႇသမ်ႇမႃႇတြႃးဢေႃႈ။
၉ မိူဝ်ႈဢၼ်ႁဝ်းႁႅင်းလဵၵ်ႉၼၼ်ႉသူႁႅင်းယႂ်ႇလႄႈႁဝ်းမီးတၢင်းဢၼ်သိူဝ်းပျေႃႇဢေႃႈ။ႁဝ်းသူးတွင်းႁႂ်ႈသူလႆႈၸေးၸုမ်ႇဢေႃႈ။
၁၀ တေႃႈလဵဝ်ၼႆႉပိူဝ်ႈဢၼ်ၵဝ်ယူႇၵႆၵၼ်တင်းသူလႄႈၵဝ်တႅမ်ႈပၼ်ၸိူဝ်ႉၼင်ႇၼႆၵႂႃႇၼင်ႇႁိုဝ်မိူဝ်ႈဢၼ်ၵဝ်ႁွတ်ႈမႃးၼၼ်ႉၸိုင်ၵဝ်ဢမ်ႇၶႂ်ႈႁဵတ်းတၢင်းဢၼ်ႁဝ်ႉၵျမ်းၸွမ်းၵႃႈၼင်ႇတၼ်းၶူဝ်းၽြႃးပဵၼ်ၸဝ်ႈဢၼ်ဢၢပ်ႈပၼ်တီႈၵဝ်ဢၼ်ပဵၼ်ပုၼ်ႈဢၼ်တၵ်းတႄႇႁဵတ်းသူ၊ဢမ်ႇၸႂ်ႈပုၼ်ႈဢၼ်တၵ်းယႃႉၽဵဝ်ႈသူပႅတ်ႈၼၼ်ႉဢေႃႈ။
တၢင်းဢၼ်တၵ်ႉလၢတ်ႈ
၁၁ လိုၼ်းလင်သုတ်းပီႈၼွင်ႉၶဝ်ဢိူၺ်း၊ႁႂ်ႈမင်ႇၵလႃႇမီးတီႈသူသေၵမ်းလူၺ်ႈ။မီးတၢင်းဢၼ်ၸေးၸုမ်ႇတၢင်းဢၼ်သၢၵ်ႈသႃႇသိူဝ်းပျေႃႇတႃႉ။မီးႁူဝ်ၸႂ်ဢၼ်လဵဝ်ၵၼ်လႄႈယူႇထုၵ်ႇထုၵ်ႇၵၼ်တႃႉ။ပေႃးႁဵတ်းၸိူဝ်ႉၼင်ႇၼႆၸိုင်ၽြႃးပဵၼ်ၸဝ်ႈဢၼ်ပၼ်မႅတ်ႈတႃႇဢိၵ်ႇတင်းၵတ်းယဵၼ်ၶျၢမ်းသႃႇတၢင်းဢၼ်ယူႇထုၵ်ႇထုၵ်ႇၵၼ်ၼၼ်ႉတၵ်းမီးယူႇလူၺ်ႈၵၼ်တင်းသူဢေႃႈ။
၁၂ ၵေႃႉၼိုင်ႈလႄႈၵေႃႉၼိုင်ႈႁဵတ်းတင်းတၢင်းၼူမ်ဢၼ်မူတ်းၸၢင်ႇသေလႄႈတၵ်ႉလၢတ်ႈၵၼ်တႃႉ။
၁၃ ၵူၼ်းမူတ်းၸၢင်ႇၵႃႈမီးၸိူဝ်းၼႆႉတၵ်ႉၼၢႆယူႇဢေႃႈ။
၁၄ ႁႂ်ႈၵျေးၸူးၸဝ်ႈယေႇသုၶရိၸ်ႉဢိၵ်ႇတင်းမႅတ်ႈတႃႇၽြႃးပဵၼ်ၸဝ်ႈတင်းတၢင်းဢၼ်ႁဵတ်းမိၵ်ႈသႁႃႇယႃႉတၢင်းဢၼ်ထုၵ်ႇၵၼ်တင်းဝိၺိၺ်ႇမူတ်းၸၢင်ႇၸဝ်ႈၼၼ်ႉမီးၼိူဝ်သူသေၵမ်းလူၺ်ႈ။ဢႃႈမိၼ်ႈ။