၁၀
တၢင်းဢၼ်ပႅတ်ႈၽူဝ်ပႅတ်ႈမေး
၁ မၼ်းၸဝ်ႈလုၵ်ႉသေၵႃႈတီႈၼၼ်ႉၵႂႃႇၵႃႈတီႈလႅၼ်လိၼ်မိူင်းယုတဢိၵ်ႇတင်းၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇဢေႃႈ။ၵူၼ်းၼမ်ၼႃႇသမ်ႉၶိုၼ်းၸူႉၵၼ်တုမ်ၵၼ်ၵႃႈတီႈမၼ်းၸဝ်ႈလႄႈမၼ်းၸဝ်ႈသင်ႇသွၼ်သုင်းမႃႉပၼ်တီႈၶဝ်ၵႃႈၼင်ႇထုင်းၸၢမ်ႇၸဝ်ႈမီးၼၼ်ႉဢေႃႈ။
၂ ၽႃႇရိသေးတင်းလၢႆမႃးတီႈမၼ်းၸဝ်ႈသေလႄႈၼင်ႇႁိုဝ်တၵ်းလႆႈၸၢမ်းတူၺ်းယႃႉယူၵ်ႉမၼ်းၸဝ်ႈၼၼ်ႉၸိုင်ၶဝ်လဝ်ႈထၢမ်လႄႈဝႃႈ၊-
၃ ၽူဝ်ထုၵ်ႇလီပႅတ်ႈမေးၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈၶိုၼ်းထၢမ်လႄႈဝႃႈ၊-မုဝ်းသေႇၸီႇယၢင်ႇဝႆႉတီႈသူၸိူဝ်ႉၼင်ႇႁိုဝ်၊မိူဝ်ႈဢၼ်ႈဝႃႈၼင်ႇၼႆၸိုင်၊ၶဝ်ၵေႃႈလဝ်ႈလၢတ်ႈလႄႈဝႃႈ၊-
၄ မုဝ်းသေႇပၼ်ဢၶႂၢင်ႉဝႆႉႁႂ်ႈတႅမ်ႈလိၵ်ႈဢၼ်ပုတ်းဢၼ်ၶၢတ်ႇပၼ်လႄႈပႅတ်ႈမေးလႆႈယူႇၶႃႈဢေႃႈ၊ဝႃႈၼင်ႇၼႆဢေႃႈ။
၅ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ပိူဝ်ႈဢၼ်ႁူဝ်ၸႂ်သူၵႅၼ်ႇၶႅင်လႄႈမုဝ်းသေႇၸင်ႇလႆႈတႅမ်ႈပိင်းၺၢပ်ႈၼၼ်ႉဢေႃႈ။
၆ မိူဝ်ႈၵေႃႇၸႃႉဢၼ်ၽၢၼ်ႇသၢင်းႁဵတ်းပဵၼ်ၼၼ်ႉၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၵူၼ်းၸၢႆးၵူၼ်းယိင်းသွင်ၵေႃႉၵူၺ်းဢေႃႈ။
၇ ၵွပ်ႈပိူဝ်ႈလွင်ႈတၢင်းၼၼ်ႉလႄႈၵူၼ်းၸၢႆးတၵ်းလႆႈၽၢတ်ႇၵၼ်တင်းပေႃႈမေႈမၼ်းသေလႄႈၸပ်းၸွမ်းမေးမၼ်းဢေႃႈ။
၈ ၶဝ်သွင်ၵေႃႉၼၼ်ႉပဵၼ်ၼိူဝ်ႉပဵၼ်လိူတ်ႈဢၼ်လဵဝ်ၵၼ်ဢေႃႈ။ပိူဝ်ႈၼႆလႄႈၽူဝ်တင်းမေးပဵၼ်သွင်ၵေႃႉဢမ်ႇၸႂ်ႈ။ပဵၼ်ၵေႃႉလဵဝ်ၵူၺ်းဢေႃႈ။
၉ ယႃႇပေႁႂ်ႈၵူၼ်းဢဝ်လွင်ႈတၢင်းဢၼ်ၽြႃးပဵၼ်ၸဝ်ႈဢဝ်ၽၵ်းဢဝ်ႁွမ်းၵၼ်ၼၼ်ႉလႆႈၽၢတ်ႇလႆႈယၢၼ်ၵၼ်၊ဝႃႈၼင်ႇၼႆဢေႃႈ။
၁၀ လိုၼ်းၼၼ်ႉၼႂ်းမိူဝ်ႈဢၼ်မီးယူႇၵႃႈၼႂ်းႁိူၼ်းၼၼ်ႉၸိုင်တပႄးၸဝ်ႈတင်းလၢႆၶိုၼ်းလဝ်ႈထၢမ်လွင်ႈတီႈႁႅင်းၼၼ်ႉထႅင်ႈဢေႃႈ။
၁၁ မၼ်းၸဝ်ႈၵေႃႈလၢတ်ႈလႄႈဝႃႈ၊-ၵေႃႉဢၼ်ပႅတ်ႈမေးမၼ်းသေလႄႈသမ်ႉၶိုၼ်းဢဝ်တၢင်ႇၵေႃႉထႅင်ႈၼၼ်ႉၽိတ်းၵႃႇမေႇသုဢေႃႈ။
၁၂ မေႈယိင်းၵေႃႈပေႃးပႅတ်ႈၽူဝ်မၼ်းသေလႄႈသမ်ႉဢဝ်ၽူဝ်တၢင်ႇၵေႃႉထႅင်ႈၸိုင်ႁွတ်ႈထိုင်တၢင်းဢၼ်ၽိတ်းၵႃႇမေႇသုဢေႃႈ၊ဝႃႈၼင်ႇၼႆဢေႃႈ။
လုၵ်ႈဢွၼ်ႇတင်းၸဝ်ႈယေႇသု
၁၃ မိူဝ်ႈၼၼ်ႉၼင်ႇႁိုဝ်မၼ်းၸဝ်ႈတၵ်းပၼ်တၢင်းလီၸိုင်ၶဝ်ဢဝ်လုၵ်ႈဢွၼ်ႇတင်းလၢႆမႃးတီႈမၼ်းၸဝ်ႈဢေႃႈ။ၵူၺ်းၵႃႈတပႄးၸဝ်ႈတင်းလၢႆတၢင်ႇဢပျႅတ်ႈတီႈၶဝ်ၸိူဝ်းဢၼ်ဢဝ်လုၵ်ႈဢွၼ်ႇမႃးၼၼ်ႉဢေႃႈ။
၁၄ ၸဝ်ႈယေႇသုႁၼ်သေယဝ်ႉၶႂ်ႈၸႃႉလႄႈလၢတ်ႈဝႃႈ၊-ပၼ်လုၵ်ႈဢွၼ်ႇၸိူဝ်းၼၼ်ႉမႃးတီႈၵဝ်တႃႉ။ယႃႇပေႁၢမ်ႈတၢပ်ႈႁႄႉၶႅၼ်ၶဝ်။မိူင်းၽြႃးပဵၼ်ၸဝ်ႈပဵၼ်မိူင်းၸိူဝ်ႉၼင်ႇၶဝ်ၼႆႉဢေႃႈ။
၁၅ ၵဝ်ဝႃႈတီႈၸိုဝ်ႈတီႈၸႂ်ႈၸမ်း ၽူႈလႂ်သေဢမ်ႇဝႃႈၵေႃႉဢၼ်ဢမ်ႇၶၢမ်ႇဢဝ်မိူင်းၽြႃးပဵၼ်ၸဝ်ႈမိူၼ်ၸိူဝ်ႉၼင်ႇလုၵ်ႈဢွၼ်ႇၼႆႉၼၼ်ႉၵေႃႉၼၼ်ႉဢမ်ႇလႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈ၊
၁၆ ဝႃႈၼင်ႇၼႆယဝ်ႉၸင်ႇ၊မၼ်းၸဝ်ႈဢုမ်ႈႁွပ်ႇဢဝ်လုၵ်ႈဢွၼ်ႇၸိူဝ်းၼၼ်ႉသေလႄႈဢဝ်မိုဝ်းတၢင်ႇၵႃႈၼိူဝ်ၶဝ်သေယဝ်ႉပၼ်တၢင်းလီၶဝ်ဢေႃႈ။
မၢဝ်ႇသထေးဢွၼ်ႇ
၁၇ ၼႂ်းမိူဝ်ႈဢၼ်မၼ်းၸဝ်ႈၸွမ်းတၢင်းၵႂႃႇယူႇၼၼ်ႉၸိုင်ၵူၼ်းၵေႃႉၼိုင်ႈလႅၼ်ႈမႃးၸူးတီႈမၼ်းၸဝ်ႈလႄႈၶုပ်ႉၶဝ်ႇသေယဝ်ႉလဝ်ႈထၢမ်လႄႈဝႃႈ၊-သြႃႇဢၼ်မျၢတ်ႈလီၶႃႈဢိူၺ်း၊ၼင်ႇႁိုဝ်တၵ်းလႆႈၶၢမ်ႇဢမူၺ်ႇထႃႇဝရႃႉဢသၢၵ်ႈၸိုင်ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။
၁၈ ၸဝ်ႈယေႇသုၵေႃႈလၢတ်ႈလႄႈဝႃႈ၊-ႁဵတ်းႁိုဝ်လႄႈမႂ်းႁွင်ႉၵဝ်ဝႃႈမျၢတ်ႈလီၼင်ႇႁိုဝ်။လိူဝ်သေၽြႃးပဵၼ်ၸဝ်ႈသူႇလဵဝ်ပႃးလဵဝ်ၼၼ်ႉၽူႈလႂ်ဢမ်ႇမျၢတ်ႈဢမ်ႇလီသေၵေႃႉ။
၁၉ မႂ်းႁူႉပိင်းၺၢပ်ႈၸဝ်ႈတင်းလၢႆယူႇဢမ်ႇၸႂ်ႈႁိုဝ်။ယႃႇပေၽိတ်းပိူင်ႈမေးပိူၼ်ႈ။ယႃႇပေဢဝ်ဢသၢၵ်ႈၵူၼ်းတၢႆ။ယႃႇပေလၵ်ႉဢုၵ်ႉၸႃႇၶူဝ်းလဵင်းပိူၼ်ႈ။ယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ယႃႇပေႁဵတ်းတၢင်းဢၼ်ဢမ်ႇတြႃးသေလႄႈသိမ်းဢဝ်ၶူဝ်းၶွင်ပိူၼ်ႈ။ႁဵတ်းရူဝ်ႇသေႇၵူဝ်ယမ်ပေႃႈမေႈမႂ်းတႃႉ၊ဝႃႈၼင်ႇၼႆဢေႃႈ။
၂၀ ၵေႃႉၼၼ်ႉၵေႃႈၶိုၼ်းလဝ်ႈလၢတ်ႈလႄႈဝႃႈ၊-သြႃႇၸဝ်ႈ၊ပိင်းၺၢပ်ႈၵႃႈမီးတင်းသဵင်ႈတင်းလူင်ၸိူဝ်းၼႆႉၵဝ်ၶႃႈၵမ်ၵျၢင်ႉမႃးၸဵမ်မိူဝ်ႈဢၼ်ၵဝ်ၶႃႈယင်းလဵၵ်ႉယင်းဢွၼ်ႇၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။
၂၁ ၸဝ်ႈယေႇသုၵေႃႈတူၺ်းၵေႃႉၼၼ်ႉသေယဝ်ႉမီးၸႂ်ဢၼ်ႁၵ်ႉဢိတ်းလူၼႃႇလႄႈၸင်ႇလၢတ်ႈဝႃႈ၊-မႂ်းလူဝ်ႇထႅင်ႈဢၼ်ၼိုင်ႈလူးၵွၼ်ႇဢေႃႈ။ၵႂႃႇလႄႈၶၢႆဢုၵ်ႉၸႃႇၶူဝ်းလဵင်းမႂ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉသေယဝ်ႉပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆၸိူဝ်းၼၼ်ႉတႃႉ။ပေႃးႁဵတ်းၸိူဝ်ႉၼင်ႇၼၼ်ၸင်ႇတၵ်းလႆႈၽၼ်ႇတႃႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ႁဵတ်းၸိူဝ်ႉၼင်ႇၼၼ်ယဝ်ႉၸင်ႇမႃးလႄႈႁၢပ်ႇဢဝ်သဝ်လၵ်းဝႃးမိုဝ်းသေယဝ်ႉၸွမ်းပႃႈလင်ၵဝ်တႃႉ၊ဝႃႈၼင်ႇ
ၼႆဢေႃႈ။
၂၂ ၵေႃႉၼၼ်ႉငိၼ်းၵႂၢမ်းၼၼ်ႉသေယဝ်ႉၼႃႈလူႉလႄႈမီးတင်းၸႂ်ဢၼ်ဢမ်ႇသိူဝ်းဢမ်ႇပျေႃႇလႄႈဢွၵ်ႇၵႂႃႇသေဢေႃႈ။လွင်ႈမၼ်းၸမ်းမၼ်းပဵၼ်ၵေႃႉဢၼ်မီးဢုၵ်ႉၸႃႇၼမ်ၼႃႇၼၼ်ႉဢေႃႈ။
၂၃ ၸဝ်ႈယေႇသုၵေႃႈတူၺ်းလဵပ်ႈႁွပ်ႈႁိမ်းႁွမ်းသေလႄႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-ၶဝ်ၸိူဝ်းဢၼ်ၸၢင်ႊမၢၵ်ႈၸၢင်ႊမီးၼၼ်ႉၶဝ်ႈၼႂ်းမိူင်းၽြႃးပဵၼ်ၸဝ်ႈယၢပ်ႇၼႃႇဢေႃႈ၊ဝႃႈၼင်ႇၼႆလႄႈတပႄးၸဝ်ႈၸိူဝ်းၼၼ်ႉၵေႃႈ၊ဢၢမ်းလွင်ႈၵႂၢမ်းၸိူဝ်းၼၼ်ႉဢေႃႈ။
၂၄ ၸဝ်ႈယေႇသုသမ်ႉၶိုၼ်းလၢတ်ႈလႄႈဝႃႈ၊-လုၵ်ႈၵဝ်တင်းလၢႆၶဝ်ဢူၺ်း၊ၶဝ်ၸိူဝ်းဢၼ်ဢိင်ပိုင်ႈဢုၵ်ႉၸႃႇၶူဝ်းလဵင်းတူဝ်ၸဝ်ႈၵဝ်ႇၼၼ်ႉၶဝ်ႈၼႂ်းမိူင်းၽြႃးပဵၼ်ၸဝ်ႈယၢပ်ႇၼႃႇဢေႃႈ။
၂၅ ၵလႃႇဢုၵ်ႉလၼ်ႈႁူးၶဵမ်ယဵင်ႈၶႅၼ်းငၢႆႈသေၵူၼ်းမၢၵ်ႈၵူၼ်းမီးၶဝ်ႈၼႂ်းမိူင်းၽြႃးပဵၼ်ၸဝ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။
၂၆ ၶဝ်ၼၼ်ႉၵႂင်ၸႂ်ယုင်ႈၸႂ်ၼႃႇလူင်လၢင်လႄႈၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊-ၽူႈလႂ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉလႆႈ၊ဝႃႈၼင်ႇၼႆဢေႃႈ။
၂၇ ၸဝ်ႈယေႇသုၵေႃႈတူၺ်းၶဝ်သေလႄႈလၢတ်ႈဝႃႈ၊-လွင်ႈတၢင်းၼႆႉၸိုင်ၵူၼ်းဢမ်ႇတတ်ႈ
ၼိုင်ႇလႆႈ။ၼႂ်းဝႃႈၼၼ်သေၵေႃႈဢၼ်ၽြႃးပဵၼ်ၸဝ်ႈဢမ်ႇတတ်ႈၼိုင်ႇလႆႈၼၼ်ႉဢမ်ႇမီး။ၽြႃးပဵၼ်ၸဝ်ႈတတ်ႈၼိုင်ႇလႆႈလွင်ႈတၢင်းတင်းသဵင်ႈတင်းလူင်ယူႇဢေႃႈ၊ဝႃႈၼင်ႇၼႆဢေႃႈ။
၂၈ မိူဝ်ႈၼၼ်ႉပေႇတရုလဝ်လၢတ်ႈလႄႈဝႃႈ၊-ႁဝ်းၶႃႈၸုၼ်ႉပႅတ်ႈၵႃႈဢၼ်ႁဝ်းၶႃႈမီးတင်းသဵင်ႈတင်းလူင်သေလႄႈၸွမ်းပႃႈလင်ၸဝ်ႈႁဝ်းမႃးၶႃႈယဝ်ႉ၊မိူဝ်ဢၼ်ဝႃႈၼင်ႇၼႆၸိုင်၊ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-
၂၉ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၽူႈလႂ်သေဢမ်ႇဝႃႈၵေႃႉဢၼ်ၸုၼ်ႉပႅတ်ႈႁိူၼ်း၊ပီႈၼွင်ႉၸဵမ်ယိင်းၸဵမ်ၸၢႆး၊ပေႃႈမေႈ၊မေးလုၵ်ႈ၊ႁႆႊၼႃးတင်းလၢႆၵွပ်ႈပိူဝ်ႈၵဝ်၊ၵွပ်ႈပိူဝ်ႈတြႃးသတၢင်းသိူဝ်းပျေႃႇၼၼ်ႉၵေႃႉၼၼ်ႉၶိင်ႇတေႃႈလဵဝ်ၼႆႉ
၃၀ တၵ်းလႆႈၶၢမ်ႇဢၵျူဝ်းၼႂ်းႁိူၼ်းပီႈၼွင်ႉၸဵမ်ယိင်းၸဵမ်ၸၢႆးပေႃႈမေႈမေးလုၵ်ႈႁႆႊၼႃးပၢၵ်ႇပုၼ်ႊဢိၵ်ႇပႃးတၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉလႄႈၼႂ်းၸၢတ်ႈၼႃႈၼၼ်ႉၵေႃႈတၵ်းလႆႈဢသၢၵ်ႈထႃႇဝရႃႉဢေႃႈ။
၃၁ ၶဝ်ၸိူဝ်းဢၼ်တူၵ်းဢွၼ်တၢင်းၼမ်ၼႃႇၸိူဝ်းၼၼ်ႉတၵ်းတူၵ်းလိုၼ်းဢေႃႈ။ၶဝ်ၸိူဝ်းဢၼ်တူၵ်းလိုၼ်းၼမ်ၼႃႇၸိူဝ်းၼၼ်ႉတၵ်းတူၵ်းဢွၼ်တၢင်းဢေႃႈ။
လွင်ႈတၢင်းဢၼ်တၵ်းၶၢမ်ႇတၢင်းတၢႆ
၃၂ ၼႂ်းမိူဝ်ႈဢၼ်ၶဝ်ၸွမ်းတၢင်းၶိုၼ်ႈၵႂႃႇၵႃႈတီႈဝဵင်းယေႇရုသလႅမ်ႇယူႇၼၼ်ႉၸိုင်ၸဝ်ႈယေႇသုဢွၼ်ႁူဝ်ၶဝ်ၵႂႃႇဢွၼ်တၢင်းလႄႈတပႄးၸဝ်ႈၸိူဝ်းၼၼ်ႉမီးတၢင်းဢၼ်ၵႂင်ၸႂ်ယုင်ႈၸႂ်ယူႇလႄႈၶဝ်ၸိူဝ်းဢၼ်ၸွမ်းၵႂႃႇၸိူဝ်းၼၼ်ႉၵေႃႈမီးၸႂ်ဢၼ်ၵူဝ်ႁေဢေႃႈ။မိူဝ်ႈၼၼ်ႉမၼ်းၸဝ်ႈသမ်ႉၶိုၼ်းႁွင်ႉဢဝ်တပႄးၸဝ်ႈသိပ်းသွင်ပႃးၼၼ်ႉသေယဝ်ႉလၢတ်ႈၼႄလွင်ႈတၢင်းဢၼ်တၵ်းလႆႈပဵၼ်မႃးၵႃႈတီႈတူဝ်မၼ်းၸဝ်ႈၼၼ်ႉလႄႈဝႃႈ၊-
၃၃ တေႃႈလဵဝ်ၼႆႉႁဝ်းၶိုၼ်ႈၵႂႃႇၸူးဝဵင်းယေႇရုသလႅမ်ႇယူႇဢေႃႈ။လုၵ်ႈၵူၼ်းတၵ်းၶၢမ်ႇတၢင်းဢၼ်ဢၢပ်ႈတီႈယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတၢင်းလၢႆဢေႃႈ။ၶဝ်တၵ်းၸီႇယၢင်ႇႁႂ်ႈတၢႆဢေႃႈ။ၶဝ်တၵ်းဢဝ်ဢၢပ်ႈပၼ်တီႈၵူၼ်းတၢင်ႇၸိူဝ်ႉတၢင်ႇၶိူဝ်းဢေႃႈ။
၃၄ ၶဝ်ၸိူဝ်းၼၼ်ႉၵေႃႈတၵ်းႁဵတ်းပျၢၵ်ႈႁဵတ်းၶူဝ်တီႈမၼ်းတၵ်းယႅၼ်ႉထုပ်ႉမၼ်းတၵ်းဢဝ်တင်းၼမ်ႉလၢႆးထုမ်ႇသႂ်ႇမၼ်းလႄႈတၵ်းဢဝ်မၼ်းတၢႆဢေႃႈ။ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉမၼ်းတၵ်းလုၵ်ႉၶိုၼ်းလိပ်းဢေႃႈ၊ဝႃႈၼင်ႇၼႆဢေႃႈ။
တပႄးၸဝ်ႈသွင်ၵေႃႉယွၼ်းဢရႃႇ
၃၅ မိူဝ်ႈၼၼ်ႉယႃႇၵုပ်ႉတင်းယုဝ်းႁၢၼ်ႇဢၼ်ပဵၼ်လုၵ်ႈၸၢႆးၸေႇပေႇတေးၼၼ်ႉသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ႈလၢတ်ႈလႄႈဝႃႈ၊-ႁဝ်းၶႃႈၶႂ်ႈႁႂ်ႈၸဝ်ႈႁဝ်းႁဵတ်းပၼ်ၵႃႈဢၼ်ႁဝ်းၶႃႈယွၼ်းၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၃၆ မၼ်းၸဝ်ႈၵေႃႈထၢမ်လႄႈဝႃႈ၊-သူၶႂ်ႈႁႂ်ႈၵဝ်ႁဵတ်းၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈလဝ်ႈလၢတ်ႈလႄႈဝႃႈ၊-
၃၇ ၸဝ်ႈႁဝ်း၊ၶႅၼ်းတေႃႈပၼ်ဢၶႂၢင်ႉႁႂ်ႈႁဝ်းၶႃႈလႆႈၼင်ႈၵႃႈတီႈၽၢႆႇၶႂႃၸဝ်ႈႁဝ်းၵေႃႉၼိုင်ႈၵႃႈတီႈၽၢႆႇသၢႆႉၸဝ်ႈႁဝ်းၵေႃႉၼိုင်ႈၵႃႈၼႂ်းမုၼ်ၽုင်းၸဝ်ႈႁဝ်းၼၼ်ႉသေၵမ်းၶႃႈဝႃႈၼင်ႇၼႆဢေႃႈ။
၃၈ ၸဝ်ႈယေႇသုၵေႃႈလၢတ်ႈလႄႈဝႃႈ၊-သူဢမ်ႇႁူႉလွင်ႈဢၼ်သူယွၼ်းၼၼ်ႉ။ၸွင်ႇသူတၵ်းၵိၼ်လႆႈၵွၵ်းဢၼ်ၵဝ်ၵိၼ်ၼၼ်ႉႁိုဝ်။တၵ်းၶၢမ်ႇဢဝ်လႆႈပပ်ႉတိၸၢမ်ႇဢၼ်ၵဝ်ၶၢမ်ႇၼၼ်ႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၵေႃႈလၢတ်ႈလႄႈဝႃႈ၊-လႆႈယူႇၶႃႈဢေႃႈ၊ဝႃႈၼင်ႇၼႆဢေႃႈ။
၃၉ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵွၵ်းဢၼ်ၵဝ်ၵိၼ်ၼၼ်ႉသူတၵ်းလႆႈၵိၼ်ယူႇဢေႃႈ။ပပ်ႉတိၸၢမ်ႇဢၼ်ၵဝ်ၶၢမ်ႇၼၼ်ႉၵေႃႈသူတၵ်းလႆႈၶၢမ်ႇယူႇဢေႃႈ။
၄၀ ၼႂ်းဝႃႈၼၼ်သေၵေႃႈလွင်ႈဢၼ်တၵ်းလႆႈၼင်ႈၵႃႈတီႈၽၢႆႇၶႂႃၵဝ်ၵႃႈတီႈၽၢႆႇသၢႆႉၵဝ်ၼၼ်ႉ၊ဢမ်ႇၸႂ်ႈၵဝ်တၵ်းလႆႈပၼ်။ၵူၺ်းၵႃႈၸိူဝ်ႉၼင်ႇဢၼ်မႄးႁႅၼ်းဝႆႉၼၼ်ႉတၵ်းပဵၼ်ပုၼ်ႈၶဝ်ႁင်းၽႂ်ႁင်းမၼ်းယူႇဢေႃႈ၊ဝႃႈၼင်ႇၼႆဢေႃႈ။
၄၁ တပႄးၸဝ်ႈသိပ်းပႃးၸိူဝ်းၼၼ်ႉလႆႈငိၼ်းသေယဝ်ႉၸႂ်မႆႈၶႂ်ႈၸႃႉတီႈယႃႇၵုပ်ႉတင်းယုဝ်းႁၢၼ်ႇသွင်ပီႈၼွင်ႉၼၼ်ႉဢေႃႈ။
၄၂ ၸဝ်ႈယေႇသုႁွင်ႉဢဝ်ၶဝ်လႄႈလၢတ်ႈဝႃႈ၊-ၶဝ်ၸိူဝ်းဢၼ်ပိူၼ်ႈႁွင်ႉဝႃႈၶုၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉၸၢင်ႊဢုပ်ႉပိူင်ႇၶဝ်ဢေႃႈ။ၶဝ်ၸိူဝ်းဢၼ်ပဵၼ်ၵူၼ်းယႂ်ႇၵူၼ်းလူင်ၸိူဝ်းၼၼ်ႉၵေႃႈၸၢင်ႊဝႆႉဢႃႇၼႃႇဢေႃႈ၊ဝႃႈၼႆသူႁူႉယူႇဢေႃႈ။
၄၃ ၼႂ်းသူၸမ်းဢမ်ႇလႆႈပဵၼ်ၸိူဝ်ႉၼင်ႇၼၼ်။ၼႂ်းသူၼႆႉၽူႈလႂ်သေဢမ်ႇဝႃႈၵေႃႉ
ဢၼ်ၶႂ်ႈပဵၼ်ၵူၼ်းယႂ်ႇၼိူဝ်ပိူၼ်ႈၼၼ်ႉတၵ်းလႆႈပဵၼ်ၵူၼ်းၸႂ်ႉၵူၼ်းသွႆသူဢေႃႈ။
၄၄ ၼႂ်းသူၼႆႉၽူႈလႂ်သေဢမ်ႇဝႃႈၵေႃႉဢၼ်ၶႂ်ႈပဵၼ်ၵူၼ်းႁူဝ်သူၼၼ်ႉတၵ်းလႆႈပဵၼ်ၶႃႈသူဢေႃႈ။
၄၅ လွင်ႈမၼ်းၸမ်းလုၵ်ႈၵူၼ်းမႃးႁႂ်ႈလႆႈၸႂ်ႉၵိၼ်ပိူၼ်ႈဢမ်ႇၸႂ်ႈ။မႃးႁႂ်ႈလႆႈၶၢမ်ႇတၢင်းဢၼ်ပိူၼ်ႈၸႂ်ႉဢိၵ်တင်းႁႂ်ႈလႆႈၸုၼ်ႉဢသၢၵ်ႈတူဝ်ၸဝ်ႈၵဝ်ႇသေလႄႈထူတ်ႇဢဝ်ၵူၼ်းၼမ်ၼႃႇဢေႃႈ၊ဝႃႈၼင်ႇၼႆဢေႃႈ။
ၵူၼ်းတႃမွတ်ႇၶိုၼ်းႁၼ်မႃး
၄၆ ၶဝ်ႁွတ်ႈထိုင်ၵႃႈတီႈဝဵင်းယေႇရိၶုဝ်းသေယဝ်ႉၼႂ်းမိူဝ်ႈဢၼ်မၼ်းၸဝ်ႈဢိၵ်ႇတင်းတပႄးၸဝ်ႈတင်းလၢႆတင်းၵူၼ်းၸူႉၵူၼ်းတုမ်ၼမ်ၼႃႇဢွၵ်ႇသေၵႃႈၼႂ်းဝဵင်းၼၼ်ႉၵႂႃႇယူႇၼၼ်ႉၸိုင်ပႃႇတိမေႇဢၼ်တႃမွတ်ႇဢၼ်ပဵၼ်လုၵ်ႈၸၢႆးတိမေႇၼၼ်ႉၼင်ႈယူႇၵႃႈတီႈႁိမ်းတၢင်းလႄႈယွၼ်းပိူၼ်ႈၵိၼ်ယူႇဢေႃႈ။
၄၇ ၵေႃႉၼၼ်ႉမိူဝ်ႈဢၼ်လႆႈႁူႉလွင်ႈဢၼ်ၸဝ်ႈယေႇသုၵူၼ်းဝဵင်းၼႃႇၸရႅတ်ႉၼၼ်ႉမီးယူႇၵႃႈတီႈႁိမ်းၼၼ်ႉၸိုင်မၼ်းႁွင်ႉသႅၼ်ႇလႄႈဝႃႈ၊-ၸဝ်ႈယေႇသုလုၵ်ႈတႃႇဝိတ်ႉတီႈၶႃႈ၊ဢိတ်းလူၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။
၄၈ ပဵၵ်ႉသမ်ႉၵူၼ်းၼမ်ၼႃႇႁိုတ်းမၼ်းႁႂ်ႈမၼ်းယူႇတဵတ်ႇတဵတ်ႇယဵၼ်ယဵၼ်သေၵေႃႈမၼ်းယဵင်ႈၶႅၼ်းႁွင်ႉသႅၼ်ႇထႅင်ႈလႄႈဝႃႈ၊-လုၵ်ႈတႃႇဝိတ်ႉတီႈၶႃႈ၊ဢိတ်းလူၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။
၄၉ ၸဝ်ႈယေႇသုၸင်ႇၸုၵ်းၵိုတ်းသေလႄႈမီးဢမိင်ႉဝႃႈ၊-ႁွင်ႉမၼ်းမႃးတႃႉ၊ဝႃႈၼင်ႇၼႆဢေႃႈ။ၶဝ်ၵေႃႈႁွင်ႉၵူၼ်းတႃမွတ်ႇၼၼ်ႉလႄႈဝႃႈ၊-ပျေႃႇၸႂ်မႂ်းလႄႈ။လုၵ်ႉလႄႈ။မၼ်းၸဝ်ႈႁွင်ႉမႂ်းယူႇယဝ်ႉ၊ဝႃႈၼင်ႇၼႆဢေႃႈ။
၅၀ ၵေႃႉၼၼ်ႉၵေႃႈပႅတ်ႈဝႆႉၽႃႈမႆႊမၼ်းသေယဝ်ႉၽုတ်းလုၵ်ႉလႄႈၵႂႃႇၸူးၵႃႈတီႈၸဝ်ႈယေႇသုဢေႃႈ။
၅၁ ၸဝ်ႈယေႇသုၵေႃႈထၢမ်လႄႈဝႃႈ၊-ၶႂ်ႈႁႂ်ႈၵဝ်ႁဵတ်းတီႈမႂ်းၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၵူၼ်းတႃမွတ်ႇၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ႁဵတ်းႁႂ်ႈမၢၵ်ႇတႃၵဝ်ၶႃႈႁၼ်မႃးသေၵမ်းၶႃႈ၊ဝႃႈၼင်ႇၼႆဢေႃႈ။
၅၂ ၸဝ်ႈယေႇသုၵေႃႈမီးဢမိင်ႉလႄႈဝႃႈ၊-ၵႂႃႇတႃႉ။တၢင်းယုမ်ႇမၢတ်ႈမႂ်းၵႄႇၶျွတ်ႈဢဝ်မႂ်းယဝ်ႉ၊ဝႃႈၼင်ႇၼႆဢေႃႈ။မိူဝ်ႈၼၼ်ႉၵမ်းလဵဝ်ၵေႃႉၼၼ်ႉမၢၵ်ႇတႃမၼ်းႁၼ်မႃးလႄႈၸွမ်းပႃႈလင်မၼ်းၸဝ်ႈၵႂႃႇၵႃႈတီႈၼႂ်းတၢင်းၼၼ်ႉဢေႃႈ။