Chapter
၁၆
ၵူၼ်းဢွၼ်ႈႁူဝ်လႂ်ၶႄႉၶဵင်ၵၼ်တင်းမုဝ်းသေႇ
၁ ၵေႃႇရလုၵ်ႈၸၢႆးဢိသႁႃႇ၊လုၵ်ႈၸၢႆးၵေႃႇႁတ်ႉၵူၼ်းမဵဝ်းလေႇဝိ၊တႃႇသၼ်ႇတင်းဢၽိရမ်ႇ လုၵ်ႈၸၢႆးဢေႇလျႃႇၽ၊ ဢေႃႇၼလုၵ်ႈၸၢႆးပေႇလိတ်ႉၵူၼ်းမဵဝ်းရုပိၼ်ႇ ၸိူဝ်းၼၼ်ႉၸူႉၵူၼ်းသေလႄႈ ႁူမ်ႈလူၺ်ႈၵၼ်တင်းၵူၼ်းမဵဝ်းဢိသရေႇလ သွင်ပၢၵ်ႇႁႃႈသိပ်းဢၼ်ႁဵတ်းၶုၼ်ၵႃႈၼႂ်းပရိၵ်ႈသၢတ်ႈ ဢၼ်မူႇၸုမ်းၵူၼ်းၽွမ်ႉၵၼ်လိူၵ်ႈၵဵပ်းဢဝ် ဢၼ်ဢွၵ်ႇၸိုဝ်ဢွၵ်ႇသဵင်ၸိူဝ်းၼၼ်ႉသေယဝ်ႉဢွၼ်ၵၼ်လုၵ်ႉၽိုၼ်ႉယူႇ ၵႃႈတီႈၽၢႆႇ ၼႃႈမုဝ်းသေႇဢေႃႈ။
၂ ၶဝ်ၸူႉၵၼ်တုမ်ၵၼ်ယူႇၽၢႆႇၼိုင်ႈၵၼ်တင်းမုဝ်းသေႇဢိၵ်ႇတင်း ဢႃႇရုၼ်ႇသေလႄႈလၢတ်ႈဝႃႈ၊- သူပေႃးတႃႉ။ပရိၵ်ႈသၢတ်ႈၵႃႈမီးတင်းသဵင်ႈတင်းလူင်ၸိူဝ်းၼႆႉ မူတ်းၸၢင်ႇယူႇၵူႈၵေႃႉၵူႈၵူၼ်းဢေႃႈ။
၃ ထႃႇဝရႃႉၽြႃးမီးယူႇၼႂ်းၶဝ်ဢေႃႈ။ပိူဝ်ႈၼႆလႄႈၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူယုၵ်ႉယွင်ႈတူဝ်ၸဝ်ႈၵဝ်ႇၵႃႈၼိူဝ်ပရိၵ်ႈသၢတ်ႈ ထႃႇဝရႃႉၽြႃး ၼင်ႇႁိုဝ်၊ဝႃႈၼင်ႇၼႆဢေႃႈ။
၄ မုဝ်းသေႇငိၼ်းၵႂၢမ်းၼၼ်ႉ သေယဝ်ႉမူပ်ႇတဵတ်ႇယူႇဢေႃႈ။
၅ လၢႆးသမ်ႉမၼ်းလၢတ်ႈတီႈၵေႃႇရဢိၵ်ႇတင်း မူႇၵူၼ်းၽုင်ၵူၼ်းမၼ်းၼၼ်ႉလႄႈဝႃႈ၊-ဝၼ်းမိူဝ်ႈၽုၵ်ႈထႃႇဝရႃႉၽြႃးတၵ်းၼႄပျႃးလွင်ႈဢၼ်ၽူႈ လႂ်ပဵၼ်ၵူၼ်းမၼ်းၸဝ်ႈ၊ၽူႈ လႂ်မူတ်းၸၢင်ႇ၊ တၵ်းႁႂ်ႈၽူႈ လႂ်သုတ်ႉၸပ်းသုတ်ႉၸူးတီႈမၼ်းၸဝ်ႈၼၼ်ႉဢေႃႈ။မၼ်းၸဝ်ႈတၵ်းႁႂ်ႈၵေႃႉဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉ သုတ်ႉၸပ်းသုတ်ႉၸူးၵႃႈတီႈမၼ်းၸဝ်ႈဢေႃႈ။
၆ လွင်ႈတၢင်းဢၼ်သူတၵ်းလႆႈႁဵတ်းၸမ်း သူဢွၼ်ၵၼ်ဢဝ်လၢင်ႇပၢၼ်းသေလႄႈဝၼ်းမိူဝ်ႈၽုၵ်ႈဢဝ်ၽႆးသႂ်ႇၵႃႈၼႂ်းမၼ်းလႄႈ ဢဝ်ၼၢမ်ႇသႃႇတၢင်ႇသႂ်ႇၵႃႈၼိူဝ်ၼၼ်ႉ ၵႃႈတီႈၽၢႆႇၼႃႈထႃႇ ဝရႃႉၽြႃးတႃႉ။
၇ မိူဝ်ႈၼၼ်ႉၵေႃႉဢၼ်ထႃႇဝရႃႉၽြႃးလိူၵ်ႈၵဵပ်းဢဝ်ၼၼ်ႉ တၵ်းပဵၼ်ၵေႃႉဢၼ်မူတ်းၸၢင်ႇဢေႃႈ။သူဢၼ်ပဵၼ်ၵူၼ်းမဵဝ်းလေႇဝိၶဝ်ဢိူၺ်း သူပေႃးတႃႉ ဝႃႈၼင်ႇၼႆဢေႃႈ။
၈ မုဝ်းသေႇသမ်ႉလၢတ်ႈတီႈၵေႃႇရလႄႈဝႃႈ၊-သူဢၼ်ပဵၼ်ၵူၼ်းမဵဝ်းလေႇဝိၶဝ်ဢိူၺ်း။
၉ ဢွၼ်ၵၼ်ထွမ်ႇငိၼ်းတႃႉ။သူႁဵတ်းဢမ်ႇပေႃးၼင်ႇႁိုဝ်တီႈၵျေးၸူးတၢင်းဢၼ်ၽြႃးပဵၼ်ၸဝ်ႈၽေဢဝ်သူဢွၵ်ႇသေၵႃႈၼႂ်းပရိၵ်ႈသၢတ်ႈ ၵူၼ်းမဵဝ်းဢိသရေႇလလႄႈ ဢဝ်သူဝႆႉၵႃႈတီႈႁိမ်းမၼ်းၸဝ်ႈႁႂ်ႈသူလႆႈပွင်ႁဵတ်းဢမူႉသုမ်ႉထဵင်ထႃႇဝရႃႉၽြႃးလႄႈ ႁႂ်ႈသူလႆႈၸုၵ်းယူႇၵႃႈတီႈၽၢႆႇၼႃႈပရိၵ်ႈသၢတ်ႈသေယဝ်ႉ ပႂ်ႉဢမူႉၶဝ်ၼၼ်ႉ ယဝ်ႉ။
၁၀ မၼ်းၸဝ်ႈဢဝ်မႂ်း ဢိၵ်ႇတင်းပီႈၼွင်ႉမႂ်းၵူၼ်းမဵဝ်းလေႇဝိ တင်းသဵင်ႈတင်းလူင်ဝႆႉၵႃႈတီႈႁိမ်းမၼ်းၸဝ်ႈယူႇၵေႃႈ သူယင်းဢွၼ်ၵၼ်ႁႃဢဝ်ဢရႃႇယိတ်ႉ ပရေႃးႁိၵ်ႈလူင်ပေႇ။
၁၁ မႂ်းဢိၵ်ႇတင်းမုၵ်ႉၵူၼ်းၸိူဝ်းၵူၼ်းမႂ်းၵႃႈမီးၸိူဝ်းၼၼ်ႉ ၸူႉၵၼ်တုမ်ၵၼ်ယူႇၽၢႆႇၼိုင်ႈၵၼ်တင်းထႃႇဝရႃႉၽြႃးလူင်ပေႇ။ဢႃႇရုၼ်ႇၼၼ်ႉပဵၼ်
ၵူၼ်းၸိူဝ်ႉၼင်ႇႁိုဝ်လႄႈ သူတၵ်းလႆႈတၢင်ႇဢပျႅတ်ႈပွင်ႉၶင်းပွင်ႉမိူၼ်ႇတီႈမၼ်းဝႃႈၼင်ႇၼႆသေယဝ်ႉ
၁၂ မုဝ်းသေႇပွႆႇၸႂ်ႉၵႂႃႇႁႂ်ႈလႆႈႁွင်ႉဢဝ်တႃႇသၼ်ႇ တင်းဢၽိရမ်ႇလုၵ်ႈၸၢႆးဢေႇလျႃႇၽ ၸိူဝ်းၼၼ်ႉမႃးဢေႃႈ။သွင် ၶႃၵေႃႈၶိုၼ်းလၢတ်ႈဝႃႈ၊-
၁၃ ႁဝ်းဢမ်ႇမႃး။မႂ်းဢဝ်ႁဝ်းဢွၵ်ႇသေၵႃႈၼႂ်းမိူင်း ဢၼ်ၼမ်ႉၼူမ်းတင်းၼမ်ႉၽိုင်ႈလႆယူႇၼၼ်ႉမႃး ႁႂ်ႈလႆႈဢဝ်ႁဝ်းတၢႆၵႃႈတီႈထိူၼ်ႇၼႆႉဢမ်ႇၵႃး မႂ်းႁဵတ်းၶုၼ်ယူႇၵႃႈၼိူဝ်ႁဝ်းလုမ်းလုမ်းလူင် ပေႇ။
၁၄ ၼွၵ်ႈသေၼၼ်ႉဢမ်ႇၵႃးမႂ်းယင်းဢမ်ႇဢဝ်ႁဝ်းၵႂႃႇၵႃႈတီႈမိူင်းဢၼ်ၼမ်ႉၼူမ်းတင်းၼမ်ႉၽိုင်ႈ လႆယူႇၼၼ်ႉ။ယင်းဢမ်ႇပၼ်ဢမူၺ်ႇႁႆႊၼႃးသူၼ်ဢူးယဵၼ်ႇၸပိတ်ႉတင်းလၢႆတီႈႁဝ်းလႄႈ ၶႂ်ႈၶွၵ်းမၢၵ်ႇတႃၵူၼ်းၸိူဝ်းၼႆႉပႅတ်ႈႁိုဝ်း။ႁဝ်းဢမ်ႇမႃးၵႃႈတီႈမႂ်း၊ ဝႃႈၼင်ႇ ၼႆဢေႃႈ။
၁၅ မုဝ်းသေႇၸႂ်မႆႈၶႂ်ႈၸႃႉၼႃႇလူင်လၢင်လႄႈလဝ်ႈလၢတ်ႈတီႈထႃႇဝရႃႉၽြႃးလႄႈဝႃႈ၊- ယႃႇပေႁဵတ်းပမႃႇၼႃႉတီႈၶိူင်ပုၵ်ႉၸေႃႇၶဝ်သေၵမ်းတီႈၶႃႈ။ၶႃႈၸဝ်ႈဢမ်ႇသိမ်းဢမ်ႇဢဝ်မႃႉလီႈၶဝ်သေတူဝ်ၶႃႈ။ၶႃႈၸဝ်ႈဢမ်ႇၼိၵ်ႈၸၢၵ်ႈငႅၼ်းသေးၶဝ် သေၵေႃႉသေၵူၼ်းၶႃႈ၊ဝႃႈၼင်ႇၼႆသေယဝ်ႉ မုဝ်းသေႇလၢတ်ႈတီႈၵေႃႇရလႄႈဝႃႈ၊-
၁၆ ဝၼ်းမိူဝ်ႈၽုၵ်ႈမႂ်းတင်းမုၵ်ႉၵူၼ်းၸိူဝ်းၵူၼ်းမႂ်းၵႃႈမီးဢိၵ်ႈတင်းဢႃႇရုၼ်ႇ ဢွၼ်ၵၼ်ယူႇၵႃႈတီႈၽၢႆႇ ၼႃႈထႃႇဝရႃႉၽြႃးတႃႉ။
၁၇ သူဢွၼ်ၵၼ်ဢဝ်လၢင်ႇပၢၼ်းတူဝ်ၸဝ်ႈၵဝ်ႇႁင်းၽႂ်ႁင်းမၼ်းသေလႄႈ ဢဝ်ၼၢမ်ႇသႃႇတၢင်ႇသႂ်ႇသေယဝ်ႉ ဢွၼ်ၵၼ်ဢဝ်လၢင်ႇပၢၼ်းတူဝ်ၸဝ်ႈၵဝ်ႇ ဢၼ်ၼပ်ႉပွင်းၵၼ်ပဵၼ်လၢင်ႇပၢၼ်းသွင်ပၢၵ်ႇႁႃႈသိပ်းၼၼ်ႉ ႁင်းၽႂ်ႁင်းမၼ်းမႃးၵႃႈတီႈၽၢႆႇၼႃႈထႃႇဝရႃႉၽြႃးတႃႉ။
၁၈ မႂ်းဢိၵ်ႇတင်းဢႃႇရုၼ်ႇၵေႃႈပႃးဢဝ်လၢင်ႇပၢၼ်းတူဝ်ၸဝ်ႈၵဝ်ႇသေလႄႈမႃးတႃႉ ဝႃႈၼင်ႇၼႆလႄႈ ၶဝ်ဢွၼ်ၵၼ်ဢဝ်လၢင်ႇပၢၼ်းတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းလႄႈဢဝ်ႆးတင်းၼၢမ်ႇသႃႇတၢင်ႇသေယဝ်ႉ ဢွၼ်ၵၼ်ၸုၵ်းယူႇၵႃႈတီႈႁူးၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈ ႁူမ်ႈလူၺ်ႈၵၼ်တင်း မုဝ်းသေႇ တင်းဢႃႇရုၼ်ႇ ဢေႃႈ။
၁၉ ၵေႃႇရ ၵေႃႈႁႂ်ႈပရိၵ်ႈသၢတ်ႈတင်းသဵင်ႈတင်းလူင်ၸူႉၵၼ်တုမ်ၵၼ်ယူႇၽၢႆႇၼိုင်ႈတင်းၶဝ်ၼၼ်ႉၵႃႈတီႈၽၵ်းတူသုမ်ႉထဵင်ၸဝ်ႈ တီႈၸူႉတီႈတုမ်ပရိၵ်ႈသၢတ်ႈသေယဝ်ႉ မုၼ်ၽုင်းထႃႇဝရႃႉၽြႃးထၢင်ႇသႃးမႃးၵႃႈ တီႈပရိၵ်ႈသၢတ်ႈတင်းသဵင်ႈတင်းလူင်ဢေႃႈ။
၂၀ ထႃႇဝရႃႉၽြႃးမီးဢမိင်ႉတီႈ မုဝ်းသေႇ တင်း ဢႃႇရုၼ်ႇ လႄႈဝႃႈ၊-သွင်ၶိူဝ်ၽၢတ်ႇယၢၼ်ၵၼ်တင်းပရိၵ်ႈသၢတ်ႈသေ လႄႈယူႇတၢင်ႇတီႈတႃႉ။
၂၁ ၵဝ်တၵ်းယႃႉၶဝ်ပႅတ်ႈၵမ်းလဵဝ်ယဝ်ႉ၊ဝႃႈၼင်ႇၼႆလႄႈ ၶဝ်ဢွၼ်ၵၼ်ၶုပ်ႉမူပ်ႇသေ လႄႈလဝ်ႈဝႃႈ၊-
၂၂ ဢူဝ်း၊ ၽြႃးပဵၼ်ၸဝ်ႈ၊ၽြႃးပဵၼ်ၸဝ်ႈဢၼ်ဢုပ်ႉပိူင်ႇဢသၢၵ်ႈဝိၺိၺ်ႇသတ်ႉတဝႃႇတင်းသဵင်ႈတင်းလူင်ၼၼ်ႉတီႈၶႃႈ။ၵွပ်ႈပိူဝ်ႈဢၼ်ၵူၼ်းၵေႃႉၼိုင်ႈၽိတ်းပိူင်ႈလႄႈ ၸဝ်ႈႁဝ်းတၵ်းၸႂ်မႆႈၶႂ်ႈၸႃႉတေႃႇပရိၵ်ႈသၢတ်ႈတင်းသဵင်ႈတင်းလူင်တီႈၶႃႈႁိုဝ်၊ဝႃႈၼင်ႇၼႆဢေႃႈ။
၂၃ ထႃႇဝရႃႉၽြႃး ၵေႃႈမီးဢမိင်ႉတီႈမုဝ်းသေႇလႄႈဝႃႈ၊- သင်ႇလၢတ်ႈတီႈပရိၵ်ႈသၢတ်ႈတင်းလၢႆ
၂၄ ႁႂ်ႈၶဝ်ၵႂႃႇယူႇတီႈဢၼ်ၵႆၵၼ်တင်းတီႈယူႇၵေႃႇရ၊ တႃႇသၼ်ႇတင်းဢၽိရမ်ႇၸိူဝ်းၼၼ်ႉတႃႉ၊ဝႃႈၼင်ႇၼႆဢေႃႈ။
၂၅ မုဝ်းသေႇ လုၵ်ႉလႄႈၵႂႃႇၸူးၵႃႈတီႈတီႈယူႇတႃႇသၼ်ႇတင်း ဢၽိရမ်ႇလႄႈ ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းၵူၼ်းမဵဝ်းဢိသရေႇလ တင်းလၢႆၸိူဝ်းၼၼ်ႉၵေႃႈဢွၼ်ၵၼ် ၸွမ်းမၼ်းၵႂႃႇဢေႃႈ။
၂၆ မၼ်းသင်ႇလၢတ်ႈတီႈပရိၵ်ႈသၢတ်ႈလႄႈဝႃႈ၊-သူဢွၼ်ၵၼ်ဝေႈပႅတ်ႈတီႈယူႇၵူၼ်းႁၢႆႉၸိူဝ်းၼႆႉတႃႉ။ယႃႇပတေိူဝ်ႉပယေိပ်းဢုၵ်ႉၸႃႇၶဝ်သေၸိူဝ်ႉသေပိူင်။ပေႃးဢမ်ႇၼၼ်သူတၵ်းႁွတ်ႈထိုင်တၢင်းလူႉတၢင်းလႅဝ်လူၺ်ႈဢပျႅတ်ႈ ၵႃႈဢၼ်ၶဝ်မီးၼၼ်ႉ ဢေႃႈ၊
၂၇ မိူဝ်ဢၼ်ဝႃႈၼင်ႇၼႆၸိုင် ၶဝ်ဢွၼ်ၵၼ်ၽၢတ်ႇယၢၼ်သေတီႈဢၼ်လဵပ်ႈႁွပ်ႈႁိမ်းသုမ်ႉထဵင် ၵေႃႇရ၊တႃႇသၼ်ႇ တင်းဢၽိရမ်ႇၸိူဝ်းၼၼ်ႉသေယဝ်ႉဢွၵ်ႇၵႂႃႇၸုၵ်းယူႇၵႃႈတီႈႁူးၽၵ်းတူသုမ်ႉထဵင်ၶဝ် ႁူမ်ႈလူၺ်ႈ ၵၼ်တင်းမေးၶဝ်တင်းလုၵ်ႈဢွၼ်ႇၶဝ်ဢေႃႈ။
၂၈ မုဝ်းသေႇၵေႃႈလၢတ်ႈလႄႈဝႃႈ၊- ၼင်ႇႁိုဝ်သူတၵ်းလႆႈႁူႉလွင်ႈဢၼ်ဝႃႈထႃႇဝရႃႉၽြႃး ပွႆႇၸႂ်ႉၵဝ်မႃးႁႂ်ႈၵဝ်လႆႈႁဵတ်းလွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉဢေႃႈ၊ ဢမ်ႇၸႂ်ႈၵဝ် ၸွမ်းဢလူဝ်ႇတူဝ်ၵဝ်သေလႄႈႁဵတ်းၼၼ်ႉ၊
၂၉ ဢၼ်ဝႃႈၼၼ်ႉ ပေႃးၵူၼ်းၸိူဝ်းၼႆႉတၢႆမိူၼ်ၸိူဝ်ႉၼင်ႇသမ်ႇမထႃႇၵူၼ်းသတ်ႉတဝႃႇတၢႆၼၼ်ႉၵူၺ်းၸိုင် တၵ်းပဵၼ်သၢၵ်ႈသေႇဝႃႈ ထႃႇဝရႃႉၽြႃးပွႆႇၸႂ်ႉၵဝ်မႃးဢမ်ႇၸႂ်ႈ။
၃၀ ၵူၺ်းၵႃႈ ပေႃးထႃႇဝရႃႉၽြႃးႁဵတ်းဢၼ်မႂ်ႇလိၼ်မိူင်းတႅၵ်ႇဢႃႈသူပ်းလႄႈဢိုၼ်ပႅတ်ႈၶဝ်ဢိၵ်ႇတင်းၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းၶဝ်ၸိူဝ်းၼၼ်ႉသေယဝ်ႉၶဝ်တူဝ်လိပ်း လႆႈလူင်းၵႂႃႇၵႃႈတီႈမိူင်းမရႃႇၼၸိုင်
၃၁ သူတၵ်းလႆႈႁူႉလႆႈၸႅင်ႈလွင်ႈဢၼ်ဝႃႈ ၵူၼ်းၸိူဝ်းၼႆႉႁဵတ်းဢမ်ႇပေႃးၼင်ႇႁိုဝ်တီႈထႃႇဝရႃႉၽြႃးၼၼ်ႉဢေႃႈဝႃႈၼင်ႇၼႆလႄႈ ၼႂ်းမိူဝ်ႈဢၼ်မၼ်းလၢတ်ႈဝႃႈ ယူႇၸိူဝ်ႉၼင်ႇၼႆသုတ်းထၢတ်ႇယဝ်ႉၼၼ်ႉ
၃၂ လိၼ်မိူင်းတီႈဢၼ်ၶဝ်ယဵပ်ႇၼၼ်ႉ တႅၵ်ႇဢႃႈသူပ်းမၼ်းသေယဝ်ႉဢိုၼ်ၶဝ်ဢိၵ်ႇတင်း ၵူၼ်းႁိူၼ်းၵူၼ်းယေးၶဝ်တင်းၵူၼ်းဢၼ်ၸၢပ်ႈသႅင်ႇၵၼ်တင်းၵေႃႇရႃႉ တင်းဢုၵ်ႉ ၸႃႇၶဝ်ၵႃႈမီးၸိူဝ်းၼၼ်ႉပႅတ်ႈဢေႃႈ။
၃၃ ၼင်ႇၼၼ်လႄႈၶဝ်ဢိၵ်ႇတင်းၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းၶဝ်ၸိူဝ်းၼၼ်ႉလူင်းၵႂႃႇၵႃႈတီႈမိူင်းမရႃႇၼ တူဝ်လိပ်းသေယဝ်ႉ လိၼ်မိူင်းၶိုၼ်းငီႇၺႅၼ်ႈၵၼ်ၶိုၼ်းၵႃႈတီႈၼိူဝ်ၶဝ်သေယဝ်ႉ ၶဝ်လႆႈၶၢမ်ႇတၢင်းဢၼ်ၽဵဝ်ႈပႅတ်ႈ သေၵႃႈၼႂ်းပရိၵ်ႈသၢတ်ႈဢေႃႈ။
၃၄ ၵူၼ်းမဵဝ်းဢိသရေႇလဢၼ်မီးလဵပ်ႈႁွပ်ႈႁိမ်းႁွမ်းၼၼ်ႉ တင်းသဵင်ႈတင်းလူင်ငိၼ်းသဵင် ဢၼ်ၶဝ်ႁွင်ႉသႅၼ်ႇၼၼ်ႉသေလႄႈ ဢွၼ်ၵၼ်ပၢႆႈဢေႃႈ။လွင်ႈမၼ်းၸမ်းၶဝ်ဝႃႈ၊-ၵူဝ်လိၼ်မိူင်း တၵ်းဢိုၼ်ႁဝ်းပႅတ်ႈဢေႃႈ၊ဝႃႈၼင်ႇၼႆဢေႃႈ။
၃၅ ၵူၼ်းသွင်ပၢၵ်ႇႁႃႈသိပ်း ဢၼ်ဢဝ်ၼၢမ်ႇသႃႇတုတ်ႇၽႆးသေလႄႈ ပုၵ်ႉၸေႃႇၸိူဝ်းၼၼ်ႉၵေႃႈၽႆးဢွၵ်ႇၵႃႈတီႈထႃႇဝရႃႉၽြႃးလႄႈမႆႈပႅတ်ႈဢေႃႈ။
၃၆ ထႃႇဝရႃႉၽြႃး မီးဢမိင်ႉတီႈမုဝ်းသေႇလႄႈဝႃႈၸမ်း၊- သင်ႇလၢတ်ႈတီႈဢေႇလႃႇၸႃႇ
၃၇ လုၵ်ႈၸၢႆးယိတ်ႉပရေႃးႁိၵ်ႈဢႃႇရုၼ်ႇႁႂ်ႈမၼ်းၵဵပ်းဢဝ်လၢင်ႇပၢၼ်း ဢၼ်မီးၵႃႈၼႂ်းတီႈၽႆးမႆႈၼၼ်ႉတႃႉ။
၃၈ ပဵၼ်ဢၼ်မူတ်းၸၢင်ႇဢေႃႈ။ဢဝ်ထၢၼ်ႇၽႆးပႅတ်ႈတီႈၵႆသေယဝ်ႉဢဝ်လၢင်ႇပၢၼ်း ၶဝ်ၸိူဝ်းဢၼ်ၽိတ်းပိူင်ႈႁႂ်ႈဢသၢၵ်ႈတူဝ်ၸဝ်ႈၵဝ်ႇတၢႆၸိူဝ်းၼၼ်ႉႁဵတ်းၶႅပ်းတွင်းလိူင်ပုၼ်ႈဢၼ်တၵ်းမူမ်းႁေႃႇၵႃႈၼိူဝ်ယိၸ်ႉပလၢင်ႇတႃႉ။
၃၉ လၢင်ႇပၢၼ်းၸိူဝ်းၼၼ်ႉ ပဵၼ်ဢၼ်မူတ်းၸၢင်ႇၵွပ်ႈပိူဝ်ႈဢၼ်ၶဝ်ဢဝ်ပုၵ်ႉၸေႃႇ ၵႃႈတီႈၽၢႆႇၼႃႈ ထႃႇဝရႃႉၽြႃးလႄႈ တၵ်းလႆႈပဵၼ်ၼီႈမိၵ်ႈလၢၵ်ႈၶၼႃႇတီႈၵူၼ်းမဵဝ်း ဢိသရေႇလတင်းလၢႆဢေႃႈ၊ဝႃႈၼင်ႇၼႆလႄႈ ယိတ်ႉပရေႃးႁိၵ်ႈဢေႇလႃႇၸႃႇ ဢဝ်လၢင်ႇပၢၼ်းဢၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ၽႆးမႆႈပုၵ်ႉၸေႃႇၸိူဝ်းၼၼ်ႉသေယဝ်ႉ
၄၀ ၶဝ်ႁဵတ်းၶႅပ်းတွင်းလိူင်ပုၼ်ႈဢၼ်တၵ်း မူမ်းႁေႃႇယိၸ်ႉပလၢင်ႇလႄႈ ပဵၼ်တီႈဢၼ်ၵူၼ်းမဵဝ်းဢိသရေႇလတင်းလၢႆ တၵ်းၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ်ၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ဢမ်ႇၸႂ်ႈၵူၼ်းမဵဝ်းဢႃႇရုၼ်ႇၼၼ်ႉ ဢမ်ႇလႆႈသုတ်ႉၸပ်းသုတ်ႉၸူးႁႂ်ႈလႆႈတုတ်ႇၽႆးၼၢမ်ႇသႃႇ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ ပဵၼ်ၸိူဝ်ႉၼင်ႇၵေႃႇရဢိၵ်ႇတင်းမုၵ်ႉၵူၼ်းၸိူဝ်းၵူၼ်းမၼ်းၸိူဝ်းၼၼ်ႉ မႅၼ်ႈၸွမ်းၵႃႈၼင်ႇဢၼ်ထႃႇဝရႃႉၽြႃးဢဝ် မုဝ်းသေႇ သင်ႇလၢတ်ႈဝႆႉၼၼ်ႉဢေႃႈ။
၄၁ ဝၼ်းမိူဝ်ႈၽုၵ်ႈ ပရိၵ်ႈသၢတ်ႈၵူၼ်းမဵဝ်းဢိသရေႇလတင်းသဵင်ႈတင်းလူင် ဢွၼ်ၵၼ်တၢင်ႇဢပျႅတ်ႈပွင်ႉၶင်းပွင်ႉမိူၼ်ႇတီႈမုဝ်းသေႇတင်းဢႃႇရုၼ်ႇလႄႈဝႃႈ၊-သူၼႆႉဢဝ်ၵူၼ်းထႃႇဝရႃႉၽြႃးတင်းလၢႆတၢႆယဝ်ႉ၊ ဝႃႈၼင်ႇ ၼႆဢေႃႈ။
၄၂ မိူဝ်ႈဢၼ်ပရိၵ်ႈသၢတ်ႈတင်းလၢႆၸူႉၵၼ်တုမ်ၵၼ်ယူႇၽၢႆႇၼိုင်ႈတင်း မုဝ်းသေႇ တင်း ဢႃႇရုၼ်ႇၼၼ်ႉၸိုင် ၶဝ်ႁႅၼ်တူၺ်းသုမ်ႉထဵင်ၸဝ်ႈတီႈၸူႉတီႈတုမ်ပရိၵ်ႈသၢတ်ႈၼၼ်ႉလႄႈမွၵ်ႇၵုမ်ႈႁူမ်ႇသုမ်ႇဝႆႉလႄႈမုၼ်ၽုင်းထႃႇဝရႃႉၽြႃးထၢင်ႇသႃးမႃးဢေႃႈ။
၄၃ မုဝ်းသေႇတင်းဢႃႇရုၼ်ႇ ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈၽၢႆႇၼႃႈသုမ်ႉထဵင်ၸဝ်ႈ တီႈၸူႉတီႈတုမ်ပ ရိၵ်ႈသၢတ်ႈၼၼ်ႉဢေႃႈ။
၄၄ ထႃႇဝရႃႉၽြႃးမီးဢမိင်ႉတီႈ မုဝ်းသေႇလႄႈဝႃႈ၊-ယူႇၵႆၵၼ်တင်းပရိၵ်ႈသၢတ်ႈၸိူဝ်းၼႆႉတႃႉ။
၄၅ ၵဝ်တၵ်းယႃႉၶဝ်ပႅတ်ႈၵမ်းလဵဝ်ဢေႃႈ၊ဝႃႈၼင်ႇၼႆသေယဝ်ႉ သွင်ၶႃဢွၼ်ၵၼ်မူပ်ႇတဵတ်ႇတဵတ်ႇဢေႃႈ။
၄၆ မုဝ်းသေႇ ၵေႃႈသင်ႇလၢတ်ႈတီႈဢႃႇရုၼ်ႇလႄႈဝႃႈ၊-မႂ်းယိပ်းဢဝ်လၢင်ႇပၢၼ်းမႂ်းသေလႄႈ ဢဝ်ၽႆးၵႃႈၼိူဝ်ယိၸ်ႉပလၢင်ႇသႂ်သေယဝ်ႉ ဢဝ်ၼၢမ်ႇသႃႇတၢင်ႇသႂ်ႇသေလႄႈ ၵႂႃႇၸူးတီႈဢၼ်ပရိၵ်ႈသၢတ်ႈမီးၼၼ်ႉၶၼ်ၶၼ်ၽႂ်းၽႂ်းသေယဝ်ႉ ႁဵတ်းတၢင်းဢၼ်ၽေႇဢပျႅတ်ႈ ပုၼ်ႈၶဝ်တႃႉ။
၄၇ တၢင်းၸႂ်မႆႈၶႂ်ႈၸႃႉဢွၵ်ႇၵႃႈတီႈထႃႇဝရႃႉၽြႃးၵႂႃႇလႄႈ ၽေးၵႃႇလႃႉႁွတ်ႈမႃးမီးယူႇဝႆႉယဝ်ႉ၊ဝႃႈၼင်ႇၼႆလႄႈ ဢႃႇရုၼ်ႇႁဵတ်းၸွမ်းၵႃႈၼင်ႇဢၼ်မုဝ်းသေႇ သင်ႇလၢတ်ႈဝႆႉၼၼ်ႉသေယဝ်ႉ ၶုၼ်ႇလႅၼ်ႈၵႂႃႇၵႃႈၼႂ်းၵၢင်ပရိၵ်ႈသၢတ်ႈဢေႃႈ။မိူဝ်ႈၶိင်ႇၼၼ်ႉၽေးၵႃႇလႃႉ ယင်းပေႃးႁွတ်ႈထိုင်မႃးမီးယူႇၵႃႈ ၼႂ်းၵူၼ်းတင်းလၢႆၼၼ်ႉဢေႃႈ။
၄၈ မၼ်းၸုၵ်းယူႇၵႃႈၼႂ်းၵႄႈဝူင်ႈၵၢင် ၶဝ်ၸိူဝ်းဢၼ်ယင်းဢသၢၵ်ႈလိပ်းယူႇဢိၵ်ႇတင်း ၶဝ်ၸိူဝ်းဢၼ်တၢႆယဝ်ႉၸိူဝ်းၼၼ်ႉသေယဝ်ႉဢဝ်ၼၢမ်ႇသႃႇတၢင်ႇလႄႈ ႁဵတ်းတၢင်းဢၼ်ၽေႇဢပျႅတ်ႈပုၼ်ႈၵူၼ်းတင်းလၢႆဢေႃႈ။ၽေးၵႃႇလႃႉထၢတ်ႇယဵၼ်မႃးဢေႃႈ။
၄၉ ၼွၵ်ႈသေၶဝ်ၸိူဝ်းဢၼ်တၢႆၵွပ်ႈပိူဝ်ႈဢမူႉၵေႃႇရ ၼၼ်ႉၵူၼ်းဢၼ်တၢႆလူၺ်ႈၽေးၵႃႇလႃႉၼၼ်ႉ တင်းသဵင်ႈတင်းလူင်မီးမိုၼ်ႇသီႇႁဵင်ပၢႆၸဵတ်းပၢၵ်ႇ ဢေႃႈ။ၽေးၵႃႇလႃႉထၢတ်ႇယဵၼ်ႈၵႂႃႇယဝ်ႉလႄႈ ဢႃႇရုၼ်ႇၶိုၼ်းမႃးၸူးၵႃႈတီႈမုဝ်းသေႇ တီႈႁူးၽၵ်းတူသုမ်ႉထဵင်ၸဝ်ႈဢေႃႈ။